Berriozarko taberna batean Munduko Kopako finala ikusten ari zirela hainbat laguni egindako erasoa ikertzen ari dira

Guardia Zibilak ikerketa abiatu du igande gauean Berriozarko (Iruñerria) taberna batean Munduko Kopako finaleko partida ikusten ari zen pertsona talde batek jasandako erasoaren harira; dirudienez, barra eta borra hedagarriak zeramatzaten kaputxadun batzuek hainbat militarrek osatutako talde bati eraso egin zioten. 

Iturri batzuen arabera, erasotuak izan ziren zenbait lagun Nucleo Nacional talde naziarekin lotuta daude.

Gertaera 22:15ak aldera jazo zen, Berriozarko taberna batean. Antza denez, Aizorrozko —Aitzoain— kuarteleko militarrak joan ohi dira bertara, eta atzo gauean ere han elkartu ziren futbol partida ikusteko; terrazan bezero gehiago zegoen.

Une batean, hamar bat kaputxadun sartu ziren tabernan, eta espresuki militarrak zeuden mahaiartera joan ziren, eta barra eta borra hedagarriekin joka hasi zitzaizkien.

Guardia Zibilaren iturriek EFE agentziari jakinarazi diotenez, gutxienez hiru militar zauritu dira; horietako batek buruan zauri irekia du eta hainbat saihets hautsita. Halaber, emakume batek sudurra hautsita du. Guztira, zei zauritu daude; horietako batzuk bertan artatu zituzten eta beste batzuk osasun-zentro batera eraman zituzten.

Oraingoz ez da atxiloketarik egin, erasotzaileek ihes egin zutelako. Bestalde, erasoa jasan dutenetako batzuek salaketak jarri  dituzte, eta militarren aurkako delitua denez, Guardia Zibilaren polizia judiziala arduratuko da ikerketaz.

Horrez gain, erasotzaileek kalteak eragin zituzten lokaleko beiratean eta altzarietan.

ATME militarren elkarteak ikerketa eskatu du

Espainiako Tropa eta Marinelen Elkarteak (ATME) atzo Berriozarren izandako eraso "latza" gaitzetsi du eta gertakari horiek zigorrik gabe ez geratzeko eskatu du.

Elkarteak gogor deitoratu du "zerbitzari publikoak eraso koldar eta antolatu baten biktima izana".

ATMEk salatu duenez, "haien bila joan ziren zuzenean, tabernan haurrak eta familiak ere bazirela kontuan hartu gabe", eta zaurituei eta haien senideei babesa helarazi die.

Elkarteak ikerketa zorrotza zabaltzeko eskatu die Justiziari eta Poliziari, egileak identifikatzeko.

Berriozarko alkateak erasoa deitoratu du

Berriozarko alkate Iker Mariezkurrenak (EH Bildu) erasoa deitoratu du, eta nabarmendu du gertaera horiek ez liratekeela "inoiz gertatu behar gure herrian”.

Ohar baten bidez, alkateak elkarbizitza demokratikorako eta errespeturako deia egin du, “Berriozarko herritarren berezko bi elementu baitira”.

Azkenik, kezkatuta agertu da "udalerrian elementu eta sinbologia neonaziak" agertu direlako, eta adierazi du elementu eta sinbologia horiek ez dutela "lekurik Berriozarren”.