Kilometroak festaren urteurren borobila ospatuko dute gaur Lazkaon

1977ko urriaren 16an lehen aldiz egin zuten Kilometroak Gipuzkoako ikastolen festa, eta 50 urte geroago, ospakizuna "jaioterrira", Lazkaora, itzuliko da gaur. Goierriko udalerriak hartuko du horrenbestez, 2026ko edizioa, eta urtemuga borobila baliatuta, egitarau oparoa prestatu dute antolatzaileek, "Ibilian-ibilian, buelta!" lelopean. Goizaldean eta iluntzean busti badezake ere, egunaren zati handi batean ateri eutsiko diola iragarri du Euskalmetek. 

Lazkaoko ikastolak lau gune paratu ditu: Iturrialde aparkalekua, Lazkao Txiki plaza, Ikastola, eta Hirigoien plaza. Lau guneotan banatuko dituzte antolatutako kontzertu, bertso saio, umeentzako puzgarri eta jarduerak. 1. gunea gaztetxoei bideratuko diote, eta Skabidean, Musutruk eta Nafarroa 1512 taldeak igoko dira taula gainera. 2. guneko eskaintza euskal dantzen emanaldia, herri kirolen desafioa eta bertsolariekin taxutu dute. Lazkaoko ikastolak hartuko du 3. gunea, eta han izango dira irekiera ekitaldia, herri bazkaria eta Gozategi taldearen kontzertua. 4. gunean haurrentzako jarduerak egingo dituzte, hala nola, umeentzako DJ emanaldia eta EITBko Go¡azen telesaileko aktoreen ikuskizuna. 

Antolatzaileek garraio publikoa erabiltzeko deia egin dute; hiru aparkaleku izango dira bisitarientzat. 

Eguraldiari dagokionez, goizaldean eta arratsalde-gau partean zaparrada mardulak espero dira, baina gainerakoan ez da ia euririk espero, eta ordu askotan ateri egongo da. Tenperatura maximoak 23-24 ºC-koak izango dira, eta minimoak, 13-14 gradukoak.