NBEk eta EBk ez dituzte Mendebaldeko Saharako istiluak gaitzetsi

Tentsioa maila gorenera iritsi da Mendebaldeko Saharan Marokoko segurtasun indarrrek erresistentzia kanpalekua indarrez desegin ostean. Dozenaka dira zaurituak eta atxilotuak, eta hildakoak ere badaude, nahiz eta kopuru zehatzik ez den zabaldu. Nazio Batuen Erakundeak eta Europar Batasunak ez dute Marokoren erasoa gaitzetsi nahi izan.

Eraso larriak Aaiunera ere iritsi ziren. Fronte Polisarioak dio gutxienez bi direla hildako mendebaldeko sahararrak eta Marokoko Gobernuak dio segurtasun indarretako bost kide gutxienez hil dituztela.

Rabaten arabera, miliziak zeuden erresistentzia kanpalekuan eta horregatik egin zuten eraso. Fronte Polisarioak, berriz, gogor salatu du Marokoren indarkeria eta NBEren babesean negoziazioak egiteko borondate falta.

Bien bitartean, Marokok etxeratze agindua ezarri du sahararren eta Polizia marokoarraren arteko erasoen ostean.

Negoziazioak New Yorken

Aaiungo kanpamenduaren aurkako erasoak tentsioa gorenera eraman duen arren, Fronte Polisarioa eta Maroko aurrez aurre eseri dira bart, New Yorken, Nazio Batuen erakundean antolatutako bileran. Mendebaldeko Sahararen etorkizunaz eztabaidan, Fronte Polisarioak uste du Marokok urduri jarri nahi izan dituela elkarrizketa eten dezaten; horrela, negoziazioaren porrota sahararrei leporatu ahal izateko.

Bilerak ez du irtenbiderik ekarri, baina elkarrizketarako bidea irekiko duela espero dute.

Ez dago nazioartearen gaitzespenik

NBEk ez du gertatutakoa gaitzetsi. Europar Batasunak ere ez du gaitzespenik agertu, baina iritzi kontrajarriak daude agintarien artean. Trinidad Jimenez Atzerri Gaietarako ministroak lasaitasuna eskatu dio Marokori eta negoziazioetan aurrera jarraitzeko Fronte Polisarioari.

Eusko Legebiltzarraren "Bakea eta Askatasuna Saharan" taldeartekoa osatzen duten alderdiek gogor gaitzetsi dute Marokoren erasoa. Era berean, Donostiako Udalak ere bat egin du salaketa horrekin eta Odon Elorza alkateak Espainiako gainerako udalei eskatu die gaitzespenarekin bat egin dezaten.

Protestak euskal hiriburuetan

Euskal Herriko hiriburuetan bilkurak egin zituzten atzo gauean erasoa salatu eta sahararrei elkartasuna adierazteko.