Frantzia ere Siriari eraso egiteko prest

François Hollande Frantziako presidenteak argi adierazi du ez duela bere jarrera aldatuko Siriari dagokionez Britainia Handiak eraso militarra baztertu badu ere, eta esku-hartzeko "prest" agertu da, nahiz eta bere helburua ez izan Bachar al Asad agintetik kentzea.

"Herrialde bakoitza libre da operazio batean parte hartu ala ez erabakitzeko. Horrek Britainia Handiarentzat eta Frantziarentzat balio du", adierazi du Hollandek Le Monde egunkarian egin dioten elkarrizketa batean.

Agintari frantziarrak azpimarratu du "Damaskoko sarraski kimikoak" ezin duela "inpunitatean" geratu. Hori horrela, argi aderazi du ez duela Siria "askatzeko" edo "diktadorea agintetik kentzeko" operazio batean parte hartuko, bere helburua "erregimena herritarren kontra egiten ari den erasoa" etetea baita.

Ezer ez egitea indarkeriaren "gorakada bat izateko arriskua egongo litzateke, arma kimikoen erabilera onartuko genuke eta beste herrialdeekiko mehatxua handituko litzateke".

"Segurtasun Kontseiluak ez badu bere burua esku-hartzeko moduan ikusten, koalizio bat osatuko da. Ahalik eta zabalena izan beharko da, eta Liga Arabiarraren babesa izango du, krimena gaitzetsi eta nazioartea ohartarazi baitu", gaineratu du Hollandek.

Obamak bere kasa ekin diezaioke borrokari

Barack Obama AEBetako presidenteak eta bere segurtasun taldeak azalpenak eman dituzte Kongresuan Sirian eraso militarra egiteak dituen helburuen eta arrazoien inguruan. Erresuma Batuak esku-hartze militarrari uko egin ostean, Obamak bakarrik jokatzea erabaki dezake.

CNNk eta The New York Timesek Gobernuko hainbat iturri aipatuta zabaldu dutenez, Obamak dagoeneko erabaki du Sirian bere kabuz eraso egitea, Britainia Handiko Gobernuak Parlamentuaren erabakiari jaramon egin eta Bachar al Asaden Gobernua ez zigortzea erabaki eta gero.

Obamak "nazioartearen erantzuna" bilatuko zuela esan bazuen ere, AEBetako presidenteak bakarrik aurrera egitea erabaki lezake, baita NBEren Segurtasun Kontseiluaren babesik gabe ere. Izan ere, hor babesa lortzea oso zaila dauka, betorako eskubidea duten Errusia eta Txina kontra agertuko baitira.

Josh Earnest Etxe Zuriaren bozeramaileordeak ez du baieztatu Obamak Kongresuari baimena eskatuko ote dion, eta Kongresuarekin etengabeko harremanetan dagoela esatera mugatu da.

AEBetako legediaren arabera, ordea, Gobernuak 48 orduko epearekin jakinarazi behar dio Kongresuari eraso militarra egingo duela, eta Kongresuaren baimena behar du operazio militarra k 60 egun baino gehiago irauten badu. Hala ere, ez lizateke lehenengo aldia izango Kongresuaren baimenik gabe gerrara jotzen dutena.

Iranek abisua eman du

Hasan Firubadi Irango Armadako buruzagiak ohartarazi duenez, atzerriko herrialdeek Siriari eraso egiten badiote, erasoak "sionistak sutara eramango lituzke -Israeli aipamena eginda-", Press TV Irango telebista kateak zabaldu duenez.

"Erasoak min handia egingo lioke giza komunitateari eta haren ondorioak ez dira musulmanen komunitatean bakarrik ikusiko. Ameriketako Estatu Batuek, Erresuma Batuak eta gainerako aliatuek asko sufrituko dute Sirian eta lurraldearen inguruan indarrak sakabanatzen badituzte", gaineratu du.

Firuzabadiren esanetan, Siriako biztanleriak lehenengo momentutik erakutsi dute "erresistentzia maila handia eta kemena daukate, eta hori esker edozein gerra irabaziko dute".

Ostegun honetan bertan, Simon  Peres Israeleko presidenteak oharatarazi du Israelek "indar guztiarekin" erantzungo duela, lurraldeak edozein eraso pairatzen badu.

Erresuma Batuak ez du parte hartuko

Erresuma Batuak ez du pare hartuko Sirian balizko esku-hartze militar batean, Philip Hammond Defentsa ministroak baieztatu duenez. Izan ere, Parlamentu britainiarrak ez du onartu Sirian esku-hartze militar ''legal eta proportzionala'' egiteko David Cameron lehen ministroak aurkeztutako plana.

Ekimenak aldeko 285 boto eta kontrako 272 boto jaso ditu, eta Parlamentuaren ezezkoa aintzat hartzen duela eta ''emaiza hori oinarri hartuta'' jardungo duela aurreratu du Cameronek.

BBC telebista katean egiten dituen adierazpenetan, Hammondek esan du Estatu Batuek ''desengainu handia'' hartuko dutela, baina ministroak ez du uste erabaki horrek inongo ekintzarik geldiaraziko duenik.

Cameron: ''Balizko esku-hartze militarra ez litzateke inbasioa izango''

Cameronek defendatu duenez, Sirian balizko esku-hartze militarra egitea ez litzateke inbasioa izango eraso kimikoaren kontrako erantzuna baizik.

Oporraldia eten eta urgentziazko saioa egin dute, Erresuma Batuaren erantzuna bozkatzeko. Laboristek kontra bozkatuko zutela aurreratu dute, eta, beraz, beste osoko bilkura bat deitu beharko du asteburuan Cameronek Parlamentu osoaren babesa jaso ahal izateko.

Alderdi Laboristak eskatuta, Parlamentu britainiarrak ez du balizko esku-hartze militarraren inguruko erabakirik hartuko, NBEko ikuskatzaileen txostena izan arte. Txosten hori eskutan, bigarren bozketa egin beharko dute.

Eztabaidaren hasieran David Cameronek hitz egin du eta eraso kimikoa gizateriaren kontrako krimena dela eta gaur aurkeztutako mozioarekin ahalik eta adostasun zabalena lortu nahi dutela adierazi du.

Cameronen esanetan, ''pentsaezina'' da Siriaren kontrako eraso militarra egitea NBEko Segurtasun Kontseiluaren babesik gabe, baina bere bermerik gabe ere esku-hartze humanitarioa posible dela nabarmendu du.

Inteligentzia zerbitzuek uste dute oso litekeena dela eraso kimikoaren atzean Bachar Al Assaden erregimena egotea. Siriako Gobernuaren erantzukizuna ez du zalantzan jartzen David Cameron lehen ministroak, hori inoiz "ehuneko ehunean" frogatzea ezinezkoa bada ere.

Laboristak kontra

Cameronen Gobernuak aurkeztutako mozioaren kontra bozkatuko zutela iragarri zuen oposizioko talde nagusia den Alderdi Laboristak, baina laboristek ez dute baztertzen etorkizunean esku-hartze militarra babestea eta Siriaren kontrako froga berriak eskatu dituzte. Ed Miliband buruzagi laboristak NBEko ikuskatzaileei denbora gehiago emateko eta "froga sinesgarriak" biltzeko eskatu du.

Cameronek Parlamentuan aurkeztutako mozioaren harira, zalantzak sortu zaizkiela adierazi du laboristen bozeramaile batek.

AEBek ''justifikazio legal propioa'' landuko dutela iragarri dute

Gobernu estatubatuarrak Siriari buruzko txostena prestatzen ari da, eta arma kimikoaren erabileraren gaineko datuak emango ditu. Gainera, litekeena da txosten hori ostegun honetan argitaratzea.

Josh Earnest Etxe Zuriko bozeramailearen hitzetan, AEBetako Gobernuak ''bere justifikazioa propioa'' plazaratuko du Sirian Balizko esku-hartze militarra egiteko, eta Obama presidenteak oraindik erabakirik hartu ez duela berretsi du

Emaitzarik gabe NBEren bilera

NBEko Segurtasun Kontseiluko Batzorde Iraunkorra osatzen duten herrialdeek (AEB, Errusia, Txina, Erresuma Batua eta Frantzia) bilera egin dute ostegun arratsaldean Siriako gatazkaz hitz egiteko, eta emaitzarik gabe bukatu da bilera hori.

Atzo, asteazkena, bilera egin zuten Erresuma Batuaren proposamena aztertzeko, baina adostasunik gabeko amaitu zen atzoko hura ere bilera.

Errusiak eskatu du gaurko bilera, Diplomaziako bozeramaile baten arabera. Errusia eta Txina Siria gaitzesteko ebazpenen kontra agertu dira orain arte.

Al Asaden indarrek misilak eta kohete-jaurtitzaileak mugiarazi dituzte

Balizko eraso bati aurre egiteko hainbat misil eta kohete-jaurtitzaile mugiarazi dituzte Al Asaden indarrek Damasco iparraldean, oposozioko hainbat iturrik jakitera eman dutenez.