Bartzelonan atentatua egon litekeela ohartarazi die AEBk herritarrei

AEBko Estatu Departamentuak Bartzelonako Rambletan kontuz ibiltzeko eskatu die herritarrei, Gabon festetan "abisurik gabeko atentatua egon litekeelako".

Atzerrian bizi diren estatubatuarren laguntza koordinatzen duen Bulego Kontsularraren Twitter kontuaren bidez eman dute, hain zuzen, horren berri.

"Rambletatik baldin bazabiltzate, erne ibili ibilgailuak dabiltzan tokietan. Izan ere, baliteke Gabon festetan terroristek abisurik gabeko erasoak egitea, eta leku turistikoak, garraio-zentroak eta beste edozein toki publiko izango dute xede", esan du Bulego Kontsularrak.

Gainera, Twitterren ez ezik, kontsulatuaren webgune ofizialean ere eman dute abisua, Katalunia plazatik Portal de la Pau plazarainoko bidea egiteak dituen arriskuez ohartarazita.

Halaber, Espainiako larrialdi zerbitzuetako telefonoa 112 dela gogorarazi diete estatubatuarrei. "Adi ibili Guardia Zibilak, Polizia Nazionalak edota Esquadra Mossoek emandako abisuei.

2017ko abuztuan, Bartzelonako Rambletan zeuden hainbat oinezko harrapatu zituzten yihadistek. Ordu batzuk geroago, Cambrilsen zenbait laguni egin zieten eraso. Guztira, 16 lagun hil eta ehunka pertsona zauritu zituzten.

AEBtik kanpo ibiliko diren estatubatuarrei segurtasun oharrak helaraztea da Estatu Departamentuaren lana.

Gaur egun, Espainian 2. mailako abisua ezarri dute. Horregatik, kontuz ibiltzea aholkatu die herritarrei. Erabiltzen duten alerta sistemak, baina, 4 maila ditu.

Bestalde, Miquel Buch Kataluniako Barne kontseilariak mehatxu terroristari garrantzia kendu dio: “beste bat gehiago baino ez da; lanean gogor ari gara, beti bezala”.

“Jaso ohi den beste mehatxu bat baino ez da. Terrorismoa globalizaturik dago, eta guztiek segurtasun neurriak areagotu behar ditugu. Guk mehatxu guztiei garrantzia ematen diegu”, azaldu du Buchek RAC1 irratian.

Horregatik, “Mossoak, Udaltzaingoa eta beste poliziak lanean ari dira, beti bezala”, azpimarratu du kontseilariak. “Segur aski, kasu hau zertxobait ezberdina da AEBko kontsulatuaren txioagatik. Oihartzun handiagoa izan du, baina guk mehatxuak jaso ohi ditugu. Guztiak ikertzen dira, eta lanean gogor ari gara. Hau beste bat da”, erantsi du.

Buchen ahotan, “beldurrez bizitzea uzten baldin badugu hanka sartuko genuke. Askatasun eta normaltasun osoz bizi ahal izan behar dugu. Bestela, garaipena emango genioke”.