Musika, borrokaren aurretik

Kontzertuen lehian, Guaidok irabaziko du. Botiken eta janariaren banaketaren lehian, Maduro da faboritoa. Venezuelako oposizioak, Virgin erakundeko sortzailea den Richard Bransonen babesarekin, kontzertu handi bat antolatuko du gaur Venezuela eta Kolonbia arteko mugan, Kolonbiako aldean. Bertan izango dira musika latinoaren izar nagusi ugari.

Madurok, bere aldetik, beste kontzertu bat antolatu du mugaren Venezuelako aldean. Ez da aurreikusten izar handien parte hartzerik, beraz, musikaren ikuspuntutik ez dago alderaketarik egiterik. Baina bi kontzertuek bestelako helburuak dituzte. Oposizioak milaka boluntario elkartu nahi ditu mugan Ameriketako Estatu Batuek (AEB) dohaintzan emandako elikagai eta botikak Venezuelan sartzeko helburuz. Madurok mugan pilatu nahi ditu milaka chavista laguntza hori sartzea galaraziko dutenak.

Giza laguntzarako ohiko erakundeek, Gurutze Gorriaren modukoek, ez dute parte hartuko laguntza horren banaketan, uste dutelako ez dela neutrala eta arrazoi politikoak dituela. Beraz, venezuelarren arteko aurrez aurreko zibilera goaz; eta Madurok hala behar badu militarrengana ere jo dezake. Indartu du jada muga zaintza, soldaduen zabalpen ikusgarria eginez.