Nerabe bat hil zuen polizia frantziarraren aldeko eskaerak milioi bat euro baino gehiago bildu ditu dagoeneko

Joan den asteartean Nahel M. 17 urteko nerabea hil zuen poliziaren familiari laguntzeko eskaera batek 50.000 emaileren 120.000 euro baino gehiago bildu ditu dagoeneko, eta Nahelen familiarentzako diru-bilketa ekimenak 230.000 euro lortu ditu.

"Babesa Nanterreko poliziaren familiari, Florian M.-k bere lana egin du eta orain prezio altua ordaintzen ari da. Babestu MASIBOKI eta babestu gure polizia!", dio Jean Messiha eskuin muturreko kazetariak hasitako eskaerak.

Messiha bera pozik agertu da GoFundMe atarian dagoen proposamenaren arrakastarekin. "Milioi bat euro. Haien mundua zatika erortzen ari da. Gurea berpizten ari da. Eskerrik asko eta bejondeizuela!", argitaratu du Messihak Twitterren, hasieran 50.000 eurokoa zen eta milioi bat euroan ezarri zen muga gainditu eta gero.

Emmanuel Macron Frantziako presidenteak "Nahelen kausa aukeratu du. Guk polizia eta jendarmeria aukeratu genituen. Polizia eredugarri honek bere lana besterik ez zuen egin", argudiatu du Fronte Nazionala alderdi ultraeskuindarreko kide ohiak.

Bitartean, Nahelen familiaren alde Leetchin hasitako diru-bilketak 230.000 euro bildu ditu dagoeneko, astelehen arratsaldeko zifren arabera. "Nahel, 17 urtekoa, gaur hil da muturreko indarkeria egoeran. Atzean utzi du bere seme bakarraren galerak urratutako ama bat. Gure babesa behar du aurretik dituen proba luzeei aurre egiteko", dio eskaerak.

Agenteak tiro egin zion gazteari joan den asteartean, polizia leihatilatik begira zegoela autoa martxan jarri zuenean. Haren heriotzak bost egun jarraian eragin ditu arrazakeriaren aurkako protestak eta istiluak, eta agentea kargutik kendu eta inputatu egin dute, hilketagatik.

3.200 atxiloketa Frantzian, 2005eko protesten mailan

Alkateek eta zinegotziek manifestazioa egin dute astelehen honetan Frantzia osoan zehar, indarkeria gaitzesteko eta Vincent Jeanbrunekiko elkartasuna adierazteko. Parisko hegoaldeko L'Haÿ-les-Roses udalerriko lehen zinegotzia da, eta haren familiaren bizilekuak erasoa jasan zuen igande goizaldean izandako istiluen ondorioz. Gainera, 99 udaletxek erasoak jasan dituzte azken egunotan, eta Emmanuel Macron Frantziako presidenteak 220 alkate hartuko ditu bihar.

EITB Mediak manifestazioen amaieran jasotako adierazpenetan, Jeanbrunek esan du "errepublika eta demokrazia bera arriskuan" daudela.

Frantziako Barne Ministerioak dagoeneko 3.200 pertsona atxilotu ditu asteartean hasitako protestetan. 2005eko protesta jendetsuen kopurua berdindu du datu horrek; orduan ere bi gazteren heriotzaren ondorioz hasi ziren. Salbuespen bakarra da orain kopuru horretara sei egun eskasetan iritsi direla, hiru astetan izan beharrean.

Bost protesta-gauetan, 5.000 ibilgailu eta 10.000 paperontzi erre dituztela zenbatu du Gobernuak, 1.000 eraikin kaltetu, 250 polizia-etxeen aurkako eraso eta 700 polizia edo jendarme zauritu baino gehiago.

Azken orduetan indarkeria-oldea apaltzen ari den arren, 45.000 agentek kalean jarraitzen dute, istiluak ez daitezen berpiztu.