Guterresek Segurtasun Kontseiluari eskatu dio presioa egin dezala "giza hondamendiak saihesteko" Gazan

Nazio Batuen Erakundeko idazkari nagusi Antonio Guterresek NBEren sorrera-gutunaren 99. artikulua aipatu du asteazken honetan, Segurtasun Kontseiluari Ekialde Hurbileko egoera humanitarioaz ohartarazteko eta Israel eta Hamasen arteko su-etena bultzatzeko eskatuz.

Guterresek, 2017tik NBEren ordezkari nagusia denak, 99. artikuluari erreferentzia egiten dion lehen aldia da. Horren arabera, idazkari nagusiak Segurtasun Kontseiluari ohartarazi ahal dio nazioarteko bakea eta segurtasuna arriskuan jar dezakeen edozein gai.

"Munduko lekurik arriskutsuenetako bat"

Bien bitartean, Israelek eraso bortitzekin jarraitzen du Gazan, non Jan Yunis bezalako Zerrendako hegoaldeko hirietan borroka gogorrak mantentzen dituen. Horren ondorioz, krisi humanitario gero eta larriagoa izaten ari da ihesaldi desesperatuan dauden herritarrentzat.

Horren harira, Gazako agintariek asteazken honetan ohartarazi dute dagoeneko ez dagoela ospitale aktiborik Gazako iparraldean, eta Nazio Batuen errefuxiatu palestinarrentzako agentziak (UNRWA) ohartarazi du Zerrenda "munduko lekurik arriskutsuenetako bat" bihurtu dela.

Israelen eta Hamasen arteko azken gatazka honek 60 egun baino gehiago daramatza, eta horri Zisjordanian hainbat hilketa eta Libanon Israelgo Armadaren eta Hizbularen arteko liskarrak ere batu behar zaizkio.

Gaur egun, Israel hirugarren fase batean murgilduta dago Gazan egiten ari den erasoaldian, Zerrendaren hegoaldean, "Hamasen gotorlekutzat" jotzen duenaren aurka, eta Jan Yunis bezalako hirietan milizianoekin borroka biziak izaten ari da.

Ospitaleak, zerbitzuz kanpo

Gazako Osasun Ministerioak iragarri duenez, Kamal Adwan ospitaleak, Zerrendaren iparraldean martxan zegoen azkenak, funtzionatzeari utzi dio, erregai faltagatik, eta anbulantziak zaurituen bila atera ezinik daude.

Ehun gorpu baino gehiago daude ospitalearen barruan hilobiratu ezinik, inguruan dauden soldadu israeldarrak "barruan mugitzen den guztiari tiro egiten diotelako".

Beste ospitale batean, Al-Aqsakoan, "paziente batzuk larrialdietako eremuan hiltzen ari dira zainketa intentsiboetarako gelarik ez dagoelako", ohartarazi du ospitaleko iturri batek.

Borroken erdian, gazatarren exodo masiboak jarraitzen du Gazako hegoaldeko Rafah aldera.

Dagoeneko 16.200 pertsona baino gehiago hil dira eta 7.000 inguru hondakinen azpian daude duela bi hilabete Gazan gerra hasi zenetik, Zerrendako Osasun Ministerioaren arabera.