Borroka Gaza osora zabaldu da, Netanyahu soldaduak bisitatzera joan da eta Sinwar berriz agertu da
Israelen erasoaldi militarrak gogor jarraitzen du aurrera Gazan. Benjamin Netanyahu Israelgo lehen ministroak tropak bisitatu ditu gaur Gaza iparraldean eta "amaierara arte" gerrarekin jarraitzeko agindu argia eraman die. Hamaseko buruzagi Yahya Sinwarrek, berriz, mezua zabaldu du bonbardaketak hasi zirenetik 80 egunera, lehen aldiz.
"Israelen aurkako borroka basati, bortitz eta aurrekaririk gabekoa" egiten ari direla adierazi du Yahya Sinwarrek, Israelen ustez urriaren 7ko erasoak antolatu zituen gizonak. Israelek uste du Jan Yunis eremuko lurpeko tuneletan ezkutatuta dagoela Sinwar eta han ari dira orain eraso gogorrenak egiten.
"Al Qasam Brigadek (Hamasen talde armatua) okupazio-armada suntsituko dute, zapaltzeko bidean daude eta ez dira okupazioaren menpe geratuko", esan du Sinwarrek.
Al Qasam Brigadek 5.000 soldadu israeldar ingururi eraso dietela gaineratu du Sinwarrek, "horien herenak hil dira, beste heren bat larriki zaurituta dago eta azken herena ezgaituta geratu da", 750 ibilgailu militar suntsitzeaz gain.
Sinwarrek emandako datuak ez datoz bat, dena dela, Israelgo Armadak emandakoekin. Zenbaketa ofizialaren arabera, urriaren 27an Zerrendan lurreko erasoaldia hasi zutenetik 156 soldadu hil dira. Era berean, urriaren 7an Hamasek Israelgo lurretan egindako erasoetan beste 333 soldadu hil ziren. Eraso horiek, guztira, 1.200 hildako eta 240 bahitu utzi zituen.
Israelek, berriz, 20.674 gazatar hil ditu azken bi hilabete eta erdian, horietatik % 70 zibilak, tartean 8.000 haur baino gehiago. Gainera, 54.536 pertsona zauritu dituzte eta 7.500 gorpu hondakinen azpian harrapatuta geratu direla uste da, Zerrendako Osasun Ministerioaren azken zenbaketaren arabera.
Netanyahuk Gazako iparraldea bisitatu du astelehen honetan
Bestalde, Netanyahuk Gazako iparraldea bisitatu du abenduaren 25 honetan, eta Hamasen aurkako gerrak "amaierara arte" jarraituko duela esan die tropei, bahitutakoen familiek su-eten bat lortzeko presioa egiten jarraitzen duten arren.
"Ez gelditu. Gerrak amaieraraino jarraitzen du. Amaitu arte, hori besterik ez ", esan die Netanyahuk, Egiptok bi asteko su-etena lortzeko egindako proposamenari erreferentzia eginez.
Hamasek su-eten iraunkorra eskatzen du bahituak presoekin trukatzeko, baina Israelek baztertu egin du, talde islamista suntsitu arte gerrarekin jarraitzea erabaki duelako.
Israelgo Armadak jakinarazi duenez, lurreko, aireko eta itsasoko tropak "Gazako Zerrenda osoan" ari dira une honetan borrokan, eta "Hamasen gune terroristei" eraso diete.
Palestinako iturri ofizialek baieztatu dutenez, goizaldetik enklabe osoan zehar izan dira erasoak, bai airekoak, bai artilleriakoak. Hildako gehien uzi dituena Maghaziko errefuxiatu-eremuaren kontra izan da.
Gazako Osasun Ministerioaren arabera, Israelgo Armadak 25 sarraski egin ditu azken 24 orduetan eta gutxienez 250 hildako eta 500 zauritu eragin ditu.
Gaza hegoaldeko osasun sistema "kolapsatzen ari da", eta iparraldean ez dago ospitalerik martxan jada, salatu duenez.
Zure interesekoa izan daiteke
Bertan behera geratu da Flotillako euskal aktibistei Loiun egin nahi zioten ongietorria, bi kide erietxean baitaude
Flotillaren ontzietan bidaiatu duten sei euskal herritarrak gaur ziren Euskal Herrira iristekoak. Horietako bi, ordea, Turkian daude ospitaleratuta, atxiloaldian jasandako indarkeriak eragindako lesioengatik, eta ez dira itzuli.
Azken 24 orduetan 31 ontzik Ormuz zeharkatu dutela adierazi du Iranek, Guardia Iraultzailearen "koordinazioarekin"
Ameriketako Estatu Batuek ziurtatu dute 94 ontzi birbideratu dituztela Irango portuetara ezarritako blokeoa betetzeko.
Dagoeneko deportatuta dauden Flotillako aktibistek haien kontrako indarkeria areagotu egin dela salatu dute
Gazara bidean zihoazela Israelek nazioarteko uretan atxilotu dituen 430 ekintzailetatik gehienak (guztiak atzerritarrak, Israelgo emakume bat izan ezik) Ramongo aireportutik atera dira, Israelgo hegoaldeko muturrean, Turkiak jarritako hiru hegazkinetan. Ekintzaileek Israelek haien kontra erabilitako indarkeria maila salatu dute.
Suak erabat suntsitu du Japoniako Reikado tenplu budista historikoa
Kukai monje budistari eskainitako tenplua 806. urtean eraiki zen Misen mendian, Miyajima uhartean, eta ordutik piztuta egon da bertan "betiereko sugarra" deitua, 1.200 urtez etengabe piztuta egon den sugar sakratua. Su horrekin piztu zen Hiroshimako Bakearen Parkeko sugarra 1964an, munduko bonba nuklear guztiak desagertu arte piztuta egongo dena. Ez da inor zauritu, baina ondare-galera ordezkaezina da.
AEBren eta Kubaren arteko tentsioa areagotu egin da Raul Castroren auzipetzearekin: Washingtonek hegazkin-ontzi bat jarri du Karibean
Auzipetzearekin batera esku-hartze militar baten mamua berpiztu da uhartean; izan ere, Nicolas Maduro ere auzipetu egin zuten Venezuelako operazio militarra abiatu aurretik.
Israelek Flotillako ekintzaile solidarioak umiliatu egin ditu
Itamar Ben Gvir Israelgo Segurtasun Nazionaleko ministro ultraeskuindarrak argitaratutako bideo batek protesten erauntsia eragin du, ministroak atxilotuei emandako tratua dela eta.
AEBk Raul Castro Kubako presidente ohia inputatu du, 1996an bi hegazkin eraisteagatik
Duela berrogei urte, Kubako ehiza-hegazkinek Floridako itsasartean Anaia erbesteratuen Erreskaterako erakundeko bi hegazkin txiki eraitsi zituzten, eta lau pilotu hil ziren.
Hilabeteak beharko dira ebolaren azken agerraldiaren aurkako txertoa lortzeko, baina arrisku globala "txikia" da, MOEren arabera
Hala ere, nazio eta eskualde mailan birusa zabaltzeko arriskua altua dela azpimarratu du Munduko Osasun Erakundeak.
Txinak aldarrikatu du Errusiarekiko harremanak "inoizko mailarik altuenean" daudela
Xi Jinping Txinako presidenteak ohore guztiekin hartu du Vladimir Putin Errusiako presidentea. Donald Trumpek Txinara egindako bisitaren ostean, bi potentziek harremanak estutu dituzte eta hogei bat akordio eta memorandun sinatu dituzte. Horrez gain, “oihanaren legea” berriz nagusitzeko arriskuaz ohartarazi dute
Trumpen gerra botereak mugatzeko eta Irandik tropak erretiratzeko ebazpen bat onartu du AEBko Senatuak
Zazpi saiakeraren ostean, AEBko Senatuak ebazpena onartu du: lau errepublikanok lerroak hautsi eta botoa aldatu dute, eta hiruk bozkatzeari uko egin diote. Hala ere, eta Ordezkarien Ganberako bozketan aurrera egingo balu ere, Trumpek betoa jartzea aurreikusten da.