Gutxienez bederatzi hildako, tartean lau kazetari, Israelek Gaza iparraldean egindako eraso batean

Gutxienez bederatzi pertsona hil ditu Israelek, tartean lau kazetari, Gaza iparraldean ibilgailu zibil baten aurka egindako erasoan, Wafa Palestinako albiste agentzia ofizialak jakinarazi duenez.

Erasoa eguerdian gertatu da, Beit Lahia herrian, eta Safa eta Sanad agentzia palestinarren tokiko iturriek baieztatu dutenez, Erresuma Batuan egoitza duen Al Jair Fundazioaren ibilgailu bat jo du Israelek airetiko eraso batean.

Kazetariak Babesteko Palestinako Zentroak (PJPC) X sare sozialeko bere kontuan zabaldu duenaren arabera, hildako kazetariak Gazako Zerrendako laguntza humanitarioaren egoerari buruzko dokumentazio lana egiten ari ziren, eta "gerrako krimena" izan da, "prentsa askatasunaren, komunikabideetako langileen eta langile humanitarioen aurkakoa".

"Nazioarteko komunitateari dei egiten diogu erasoa gaitzesteko, ikertzeko eta krimenaren erantzuleei kontuak emateko", azpimarratu du gobernuz kanpoko erakundeak.

Palestinako Kazetarien sindikatuaren esanetan, bederatzi hildakoetatik lau honako hauek dira: Bilal Abu Matar editore palestinarra, Mahmud al Sarraj, Bilal Aqila eta Mahmud Asleem kamerariak.

Beste biktimetako hiru gutxienez Erresuma Batuan egoitza zuen Al Khair Fundazioaren ibilgailu batekin laguntza banatzeko lanean ari zen elkarte humanitario bateko kideak omen ziren, baina oraindik ez dute baieztatu.

Israelgo Armadak onartu egin du herri horretan eraso egin duela, "segurtasun indarrentzat mehatxu bat zen hegazkin ez-tripulatu bat erabiltzen ari ziren bi terroristaren aurka".

Gero, "beste zenbait terrorista bertaratu dira dronea jasotzera, eta ibilgailu batean sartu dira", eta auto horren kontra egin du, X sare sozialeko bere kontuan esan duenez.

Israelek milizia armatuen jarduerak finantzatzeko taldea izatea leporatu izan dio Al Jair Fundazioari (Erresuma Batuan eta Turkian ditu egoitzak), Gazan "jarduera humanitarioaren mozorropean arituta", eta gutxienez Hamaseko goi funtzionario bat kontratatu izana.

Gazako Osasun Ministerioaren hitzetan, bederatzi "martiri" iritsi dira Gaza iparraldeko Indonesiar Ospitalera, "Israelek gaur Zerrendan egindako erasoaren ondorioz".

Ondorengo ohar batean, Hamasek "sarraski berri eta lazgarria" gaitzetsi du. Horren arabera, "etsaiak herri palestinarraren aurka egindako gerrako krimenen jarraipena" da, eta "okupazioak erasoarekin jarraitzeko eta nazioarteko lege eta konbentzio guztiekiko mespretxua erakusten duen gorakada arriskutsua".

Oharrean gaineratu duenez, Israel "nahita ari da Gazan su-eten akordioaren ezarpena eta presoen trukea osatzeko edozein aukera sabotatzen, bitartekariei eta nazioarteko komunitateari erronka nabarmena botata".