20 urteko kartzela-zigorra jarri diote Frantziako pederasta handienari, 299 biktimari sexu-erasoak egiteagatik

20 urteko kartzela-zigorra jaso du asteazken honetan Joël Le Scouarnecek, Frantziako pederastarik handientzat jotzen duten gizonak, 299 biktimari bortxaketak eta sexu erasoak egiteagatik. Horietako gehienak adin txikikoak ziren.

Vanneseko (Bretainia) Krimenen Auzitegian egin da epaiketa eta ia kargu guztien errudun jo dute gaur egun 74 urte dituen zirujau ohia. Frantzian bortxaketa delitua egiteagatik ezarri daitekeen zigorrik handiena jarri diote.

Adineko pertsona izan arren, zigorraren bi heren bete beharko ditu gutxienez, kartzelaldia arintzeko edozein neurri eskatzeko. Horrez gainera, epaileek debekatu egin diote adin txikikoekin edozein motako jarduera egitea, bizi artean. Epaimahaiaren presidenteak argudiatu duenez, erabakia hartzeko kontuan hartu dituzte delituen larritasuna eta bere "jokabide obsesiboa"; "harrapari" baten gisan jokatzen zuela azaldu du.

Akusazio partikularraren abokatuen ustez, ordea, epaia arina da, Le Scouarnecen delituen larritasunaren eta biktimen bizitzetan izan duen eragina ikusita. Legelarietako baten ustetan, zigortua "sei urteren buruan" libre atera daiteke Frantziako konputazio sistemaren kari. Hain zuzen ere, zigor hori gaur egun betetzen ari den 2020ko beste batekin bateratu daiteke.

2017ko maiatzean atxilotu zuten Jonzac herrian (Akitania) Frantzia osoko 15 ospitaletan lanean aritutako medikua, bizilagun batzuen 6 urteko alabak gurasoei sexu-eraso baten berri eman ondoren. Salaketaren ondoren egin zuten ikerketak agerian utzi zuen ezkutuko bizimodua zuela, pedofilia akutua eta bestelako parafilia batzuk zituela.

Salaketa horren ondoriozko ikerketak agerian utzi zuen bere bizitza bikoitza, bere pedofiloa zela, eta ezkutuan zeuden beste parafiliazio batzuk; ezkutuko bizimodua izan ere, koaderno idatzietan eta artxibo informatikoetan horren berri zehatza ematen zuen.

2020an 15 urteko kartzela-zigorra ezarri zioten lau adin txikiko (bizilagunen alaba, bi iloba eta paziente bat) bortxatzeagatik eta sexu-erasoak egiteagatik.

Alabaina, ikerketan zehar atzemandako material kopuru handiaren aztertuta, bigarren epaiketa bat egitea erabaki dute. Le Scouarnecek sexu-erasoen xehetasun guztiak kuadernoetan idazten zituen eta argazki eta bideo ugari gordetzen zituen. Horren ondorioz, 299 biktima (horietatik 256, adin txikikoak) identifikatu ahal izan dituzte eta 57 gehiago egon daitezkeen zantzuak topatu dituzte.

2004an interneten haur-pornografia ikusteagatik zigortu zuten medikua. Orduan bete beharrik izan ez zuen 4 hilabeteko kartzelaldia eta terapia ezarri zizkioten, baina adin txikikoekin lanean jarraitu ahal izan zuen.

Joan zen astelehenean epaimahaiaren aurrean egindako deklarazioan, biktimei "sortutako min izugarria" onartu zuen eta aitortu zuen ez duela "inolako barkamenik merezi".