Israelgo Defentsa ministroak, Greta Thunbergi: "Buelta eman ezazue, ez zarete-eta Gazara iritsiko"

Israel Katz Israelgo Defentsa ministroak ohartarazpena egin die igande honetan Greta Thunberg ekintzaile suediarrari eta Gazara bidean doan Askatasunaren Ontzidiko Madleen ontzian doazen gainerako tripulatzaileei: "Madleen ontzia Gazara irits ez dadin, beharrezko neurri guztiak har ditzatela agindu diet Israelgo Defentsa Indarrei. Argi eta garbi esaten diet Greta antisemitari eta bere lagunei: Buelta eman ezazue, ez zarete-eta Gazara iritsiko".

"Israelgo Estatuak ez dio inori Gazako itsas blokeoa urratzen utziko. Blokeoaren helburu nagusia Hamasi armak heltzea eragoztea da, bahituak dituen eta gerrako krimenak egiten dituen erakunde terrorista hiltzailea delako", gaineratu du Defentsa ministroak.

Askatasunaren Ontzidia ordezkatzen duen itsasontziak 12 ekintzaile daramatza, Thunberg tartean, eta gaur iritsi da Egiptoko kostaldera. Ohar baten bidez jakinarazi duenez, Gazako Zerrendara laguntza humanitarioa darama: haurtxoentzako formula-esnea, irina, arroza, pixoihalak, emakumeentzako osasun-produktuak, urari gatza kentzeko kitak, produktu medikoak, makuluak eta haurrentzako protesiak, besteak beste.

Ontziak bandera britainiarra du, eta igandean jarri zen Gazara bidean, Siziliatik abiatuta.

Greta Thunberg aktibista klimatikoa, Liam Cunningham aktorea eta Rima Hassan eurodiputatu frankopalestinarra doaz ontzi horretan, eta hauek dira beste bidaiariak: Yasemin Acar, Baptiste Andre, Thiago Avila, Omar Faiad, Pascal Maurieras, Yanis Mhamdi, Suayb Ordu, Sergio Toribio, Marco Van Rennes eta Reva Viard.

"Israelek eraso egiten badigu, beste gerra krimen bat izango da"

Yasemin Acar giza eskubideen aldeko aktibista alemaniarrak ondorengoa esan du Israelgo Armadaren balizko eraso baten aurrean: "Israelek eraso egiten badigu, beste gerra krimen bat izango da. Ez ginatekeen misio honetan abiatuko Gazara iritsiko garela uste izan ez bagenu".

Maiatzaren 2an, Conscience ontziak (Palauko banderapean nabigatzen duen Askatasunaren Ontzidiko ontzia hori ere) dronez egindako bi eraso jasan zituen Maltatik 14 miliara zegoenean. Elkartasun taldeak Israeli egotzi zion erasoa, baina hark ez zuen ofizialki bere gain hartu.

Rima Hassan eurodiputatuak, bere aldetik, Askatasunaren Ontzidiarentzat igarobide segurua bermatzeko eskatu die munduko gobernuei. Halaber, Europako 200 legegilek baino gehiagok Israelentzat gutun ireki bat sinatu dutela adierazi du, euren ontzia Gazara iristea ahalbidetzeko eskatuz eta "karga humanitarioa berehala sartzea errazteko" galdeginez.

"24 ordu baino gutxiago geratzen zaizkigu Israelgo agintariek legez kanpo atxilotu baino lehen"

Laster atxilotuko dituztela iragarri du Hassanek. "24 ordu baino gutxiago geratzen zaizkigu Israelgo agintariek legez kanpo atxilotu gaitzaten", adierazi du X sare sozialean argitaratutako bideo batean.

"Komunikatzerik ez dugunean, zuekin kontatzen dut ibilbide honetan zehar guretzat hain baliotsua izan den mobilizazioarekin jarraitzeko", gaineratu du.

Israelgo Armadak interbentzio operazioa hasten duenean zer gertatuko den ere iragarri du: "Tripulatzaileen gauza pertsonal guztiak konfiskatuko dituzte, eta itsasontzia, Gazako Zerrendaren iparraldean dagoen Israelgo Axdod porturaino eskoltatuta eramango dute" (6-7 orduko bidaia). "Eskuburdinak jarri eta zaintzapean jarriko gaituzte, eta litekeena da Axdoden galdeketa bat egitea gure jatorrizko herrialdeetara kanporatu aurretik", amaitu du.

Flotillako beste kide batek, Sergio Toribio aktibista espainiarrak, beste bideo bat argitaratu du aurrera jarraitzen dutela iragarriz: "Ez zaigu axola Israelek Armada guztia bidaltzea". Bideo hau Telegram bidez zuzenean emititu duen unean, Egipton 16:26 zirenean (14:26 GMT), esan du Gazatik 150 itsas miliara zeudela, 277,8 kilometrora, eta nazioarteko uretan jarraitzen zutela, "nazioarteko legea betez".

Askatasunaren Ontzidia (Freedom Flotilla Coalition, FFC) 2010ean sortu zen. Indarkeriarik erabiltzen ez duen palestinarren aldeko nazioarteko mugimendua da, dimentsio humanitarioa du, eta Israelek Gaza blokeatzearen aurka modu aktiboan borrokatzen ari da. Koalizioa osatzen duten erakundeen artean, besteak beste, hauek daude: Ship to Gaza (Suedia eta Norvegia), Canadian Boat to Gaza (Kanada), Rumbo a Gaza (Espainia), IHH (Turkia) eta US Boat to Gaza (Estatu Batuak).