Miguel Uribe Kolonbiako oposizioko senataria larri zauritu dute atentatu batean

Miguel Uribe Turbay, 2026ko hauteskundeetan Centro Democratico alderdi uribistaren presidentegai izateko hautagai eta senatari kolonbiarra, larri zauritu dute, Bogotan egiten ari zen hauteskunde kanpainako ekitaldi batean tirokatuta. Herrialdeko alderdi politiko guztiek gaitzetsi dute erasoa.

39 urteko politikaria Fontibonen egiten ari ziren ekitaldi batean hitza hartu duenean tirokatu dute, eta gertuen zegoen osasun zentrora eraman dute.

Horren osasun egoera egonkortu ostean, Fundacion Santa Fe ospitalera eraman dute anbulantzian, herrialdeko ospitale onenetako batera. Alderdiaren jarraitzaileak zain zituen bertan.

Miguel Uribe Turbay ez da Alvaro Uriberen senidea. Miguel Uribe Londoño politikari kontserbadorearen eta Diana Turbay kazetariaren semea da. Turbay narkotrafikatzaileek bahitu eta hil zuten 1991n. Julio Cesar Turbay 1978 eta 1982 bitartean Kolonbiako presidente izan zenaren biloba ere bada.

Poliziak mutiko adingabe bat atxilotu du atentatua gertatu den lekuan bertan, erasotzailea delakoan, eta pistola bat atzeman diote. Hala ere, ez dute esan zergatik eraso dioten.

Gaitzespen orokorra

Erasoaren gaitzespena orokorra izan da Kolonbia osoan, eta 90eko hamarkada ekarri du gogora, hiru presidentegai hil baitzituzten garai hartan.

"Guztiz errefusatzen dugu eraso hau, buruzagi politikoaren bizitza ez ezik, demokrazia eta askatasuna ere arriskuan jartzen baititu", adierazi du Centro Democraticok ohar batean.

Uribe Turbay Alvaro Uribe presidente ohiaren (2002-2010) gertuko politikaria da, eta Gustavo Petro egungo presidentea gogorren kritikatzen duenetako bat da. Herrialdean dagoen segurtasun gabeziaren errudun jotzen du Petro, eta Senatuak atzera bota zuen lan-erreforma herri-kontsulta bidez bozkatu nahi izatea leporatzen dio.

Atentatuak sortutako egoera larria dela eta, Petrok bertan behera utzi du Nizan (Frantzia) Nazio Batuen Erakundeak antolatu duen batzarrera egin behar zuen bidaia.

"Gertakariaren larritasunak eta Gobernu Nazionalak instituzioen eta aktore demokratiko guztien babesarekiko duen konpromisoak estatuburua eta bere lantaldea bertan egotea eskatzen du", azaldu du ohar batean.

Alderdi guztiek aho batez gaitzetsi dute atentatua, 2026ko maiatzaren 31rako aurreikusitako presidentetzarako hauteskundeen lehenengo itzulirako urtebete baino gutxiago falta denean.

Alvaro Uribe, Juan Manuel Santos, Ivan Duque, Andres Pastrana eta Ernesto Samper presidente ohiek bat egin dute gaitzespenean, politikoki aurrez aurre badaude ere.