Hamas: "Netanyahu gerra kriminalak nahi duena genozidio estrategiarekin aurrera jarraitzea da"

"Netanyahu gerra kriminalak nahi duena genozidio eta desplazamendu estrategiarekin aurrera jarraitzea da, Gazako Zerrendan gure herri palestinarraren aurkako krimen gehiago eginez", salatu du Hamas erresistentzia palestinarrerako erakundeak ohar batean. Hala, Nazioarteko Zigor Auzitegiak Israelgo lehen ministroa gerra krimenengatik eta gizateriaren aurkako krimenengatik atxilotzeko agindua eman zuela gogorarazi du Palestinako erakundeak.

Ordu batzuk lehenago, Fox News telebista estatubatuarrari egindako elkarrizketa batean, agintari israeldarrak "segurtasunagatik" Zerrenda kontrolpean hartzeko asmoa azaldu du, ondoren "indar arabiarrek zuzendutako trantsizio gobernu bati" lagatzeko, eta Palestinako lurraldearen erabateko anexioari buruzko zurrumurruak ukatu ditu.

Hamasek "adierazpen arriskutsu horiek" gaitzesteko eta errefusatzeko eskatu die herrialde arabiar eta islamiarrei eta nazioarteari, eta premiazko neurriak har ditzatela erasoa gelditzeko eta okupazioari amaiera emateko, herri palestinarra ahalduntzeko, autodeterminaziorako eskubidea gauza dezan eta Israelgo buruzagiei erantzukizunak eskatzeko.

"Netanyahuk erasoa zabaltzeko dituen asmoek, zalantzarik gabe, presoak (gatibu israeldarrak) gainetik kendu eta sakrifikatu nahi dituela berresten dute, bere interes pertsonalak eta muturreko agenda ideologikoa asetzeko. Gazak okupazioa ahaleginei gogor aurre  egingo diela baieztatzen dugu", adierazi du erakunde palestinarrak.

Gainera, "Netanyahuren adierazpenek norabide aldaketa argia adierazten dute negoziazioetan, eta argi eta garbi erakusten dute azken bileretatik alde egiteko benetako arrazoiak zeintzuk diren, azken akordio batetik gertu zeuden arren", dio Filastin egunkariak jasotako oharrak.

Azkenik, Hamasek ohartarazi dionez, bere helburuak betetzea "ez zaio doan aterako" Netanyahuri, eta Israelgo soldaduek "garesti ordainduko dute".