Bayrou Frantziako lehen ministroak konfiantza-galdean porrot egin eta dimisioa eman beharko du

Frantziako Asanblea Nazionalak François Bayrou lehen ministroaren aurkako konfiantza-galdean aurka bozkatu du. Ondorioz, politikari zentristak dimisioa eman beharko du, eta Emmanuel Macron presidentea bosgarrenez egin beharko dio aurre lehen ministroa izendatzeko erronkari.

Une labanean etorri zaio Gobernuaren gainbehera Frantziari. Izan ere, tentsio politikoak gero eta handiagoak dira, eta herrialdearen zor publikoak Europar Batasunak ezarritako % 3ko muga bikoiztu du. Zor publikoa jada BPGaren % 114ra iritsi da, eta herrialdeak finantza-merkatuen eta kreditu-kalifikazioko agentzien presioei aurre egin behar die.

74 urteko Bayrouk konfiantza-galdea egin zuen, ustekabean, 2026ko aurrekontuetan 44.000 milioi euro aurrezteko plana babesteko, defizita murrizteko eta zorra egonkortzeko. Oposizioak, ordea, ezezkoa eman dio proposamenari. Guztira 364 diputatuk egin dute aurka, eta 194k babesa eman diote.

Eztabaidan, Frantzia Intsumisoak (LFI, frantsesez), Frantziako alderdi ezkertiar nagusiak eta eserleku kopuruan hirugarrenak, dimisioa emateko eskatu dio Macroni, lehen ministroarekin batera. "Presidenteak ez du politika aldatu nahi, beraz, presidentea aldatu beharko da", esan du Mathilde Panot LFIren parlamentarien buruak.

Ildo beretik mintzatu da Marine Le Pen Bilgune Nazionala (RN, frantsesez) eskuin muturreko alderdiko burua ere, eta deitoratu du Macronek dimisioa ez aurkeztuko erabakia. "Benetako berreraikuntza presidentearen dimisioa litzateke, baina bere esku dago, eta nik harengandik ez dut ezer espero", esan du Le Penek.

Bestalde, Frantziako Alderdi Sozialistak (PS) gogor egin du lehen ministro zentristaren aurka, eta deitzeko eskatu dio presidenteari, gobernu alternatibo berri baten buru jartzeko.

Alderdi makronistak lehen ministroaren aurkako botoa eta oposizioak hauteskundeak aurreratzeko egindako erreklamazioak kritikatu ditu, eta "interes orokorreko akordio bat" lortu dezatela eskatu die diputatuei, 18 hilabete barru presidentetzarako hauteskundeak egin arte.

Horren ustez, orain premia nagusia ez da hauteskundeak deitzea, baizik eta 2026rako aurrekontuak onartzea, "bestela horrek ondorio kaltegarriak ekarriko dizkie enpresei, partikularrei eta Administrazioaren funtzionamenduari".

Macronek "hurrengo egunetan" lehen ministro berria izendatuko du François Bayrou ordezkatzeko, eta baztertu du oraingoz hauteskunde legegileak aurreratzea.

Komunikatu batean, Bayrouk bihar aurkeztuko duen dimisioa "onartuko" duela jakinarazi du Frantziako Presidentetzak.