Trumpen plana Gazan bakea lortzeko: bahituak askatzea, Hamas armagabetzea eta okupazioa uztea

Benjamin Netanyahu Israelgo lehen ministroak astelehenean onartu du, Etxe Zurian egindako agerraldi batean, Gazan bakea lortzeko AEBk egindako proposamena. Hamas talde islamistak, oraindik, ez du adierazi zer irizten dion planari. Talde islamistak jakinarazi du ez duela horren berririk.

Hauek dira planak jasotzen dituen 20 puntuak:

1- Gaza terrorismorik gabeko eremua izango da eta ez dio Israeli mehatxurik egingo.

2- Gaza bere herriaren onerako berreraikiko da.

3- Israelgo Indarrek berehalako su-etena ezarri beharko dute, eta pixkanaka bahituak askatzeko prestatu.

4- Hamasek bahitu guztiak askatuko ditu 72 orduan, bizirik zein hilik.

5- Israelek bizi osorako kartzela zigorra duten 250 preso palestinar eta urriaren 7ko atentatuen ostean atxilotutako 1.700 gazatar askatuko ditu.

6.- Hamasek konpromisoa hartu behar du elkarrekin modu baketsuan aritzeko eta armak uzteko.

7- Akordioa onartu ondoren, Gazan behar den laguntza humanitario guztia bidaliko da.

8- Laguntza humanitarioa interferentziarik gabe eta Nazio Batuen agentzien bidez sartu eta banatuko da.

9- Trump bera buru duen nazioarteko Bakearen Batzorde batek gainbegiratutako batzorde teknokratiko batek administratuko du Gaza. Batzorde horretan Tony Blair Britainia Handiko lehen ministro ohia arituko da. Palestinako Aginte erreformatuak hartuko du kontrola ondoren.

10- Gazako garapen ekonomikorako plan bat sortuko da, inbertsioak erakarriko dituena.

11- Gazan gune ekonomiko berezi bat sortuko da.

12- Ez da inor desplazatzera behartuko, eta borondatez joaten direnek itzultzeko eskubidea izango dute, baina "jendea bertan geratzera animatuko da eta Gaza hobea eraikitzeko aukera emango zaie".

13- Hamasek eta beste fakzio batzuek ezin izango dute Gaza gobernatu "ez zuzenean, ez zeharka", eta Zerrenda desmilitarizatu egingo da, nazioarteak gainbegiratuta.

14- Eskualdeko herrialdeek bermatuko dute Hamasek eta beste talde batzuek hartutako konpromisoak beteko egiten dituztela eta Gaza ez dela "herritarrentzako eta bizilagunentzako mehatxua".

15- Nazioarteko Egonkortze Indarra hedatuko da, AEBk kide arabiarrak lagunduta, Palestinako Poliziak entrenatzeko eta barneko eta mugetako segurtasuna zaintzeko. Egiptok eta Israelek eremu horretan lagunduko dute.

16- Israelek ez du ez Gaza okupatuko ezta anexionatuko ere, kontrola pixkanaka erretiratuko da eta Egonkortze Indarrari transferituko zaio, eta segurtasun-perimetro bat ezarriko du, beharrezkoa bada.

17- Hamasek proposamena "atzeratzen edo baztertzen" badu, aurreko guztia Israelek Egonkortze Indarrari transferitutako "terrorismorik gabeko" eremuetan ezarriko da.

18- Erlijioen arteko elkarrizketa sustatuko da, palestinarren eta israeldarren arteko tolerantzia eta bizikidetza baketsua sustatzeko.

19- Herrialdea berreraiki ahala eta Palestinako Agintaritzaren erreformak bete ahala, autodeterminaziorako eta Palestinako Estatua sortzeko aukera irekiko da.

20- Estatu Batuek elkarrizketa ezarriko dute Israelen eta Palestinaren artean, elkarrekin modu baketsuan eta oparoan bizitzea ahalbidetuko duen helburu politikoak adosteko.