Israelen eta Hamasen arteko lehen negozioazioak "positiboak" izan dira

Israelgo eta Palestinako Hamas taldearen negoziatzaileek Donald Trump AEBko presidenteak Gazarako proposatu duen bake-plana ezartzeari buruzko zeharkako elkarrizketekin jarraituko dute astearte arratsaldean, astearte goizaldean "giro positiboan" egindako lehen bileraren ostean, negoziazioetatik gertu dauden agentziek jakitera eman dutenez.

Egiptoko iturri baten arabera, lehen bilera horretan, Egipto, Qatar eta Turkia tartean zirela, Israel eta Hamasen ordezkariek "egungo negoziazio-txandarako bide-orria jorratu zuten, baita elkarrizketen egutegia ere".

Lehen erronda astelehenean hasi zen, Egiptoko Xarm el-Xeikh bainuetxean, Itsaso Gorrian, Trumpen proposamenaren lehen fasea ezartzeko mekanismoak eta xehetasunak adosteko. Proposamenaren arabera, Hamasek bahitu guztiak askatuko ditu, Israelek ehunka palestinar aske uztearen truke.

Iturriak azaldu duenez, talde islamistak Israelek Gazako Zerrendaren kontrako bonbardaketak bertan behera uzteko eskatu du lehen bilera horretan, "bahituak askatzeko benetako oztopo direlako", eta azpimarratu du elkarrizketek "astearte eguerditik aurrera" jarraituko dutela.

Bestalde, Palestinako iturri batek esan du bitartekariak truke-prozesurako epe argi bat ezartzen eta su-etena finkatzen saiatzen ari direla, eta adierazi duenez "elkarrizketek hainbat egun iraungo dute, bi aldeen jarrerak elkarrengandik urrun daudenez gero".

Adierazi duenez, negoziazioak "ez dira segurtasun kontuetara mugatzen; su-etenaren osteko Gazako Zerrendaren administrazioaren ingurukoak ere badira, bai eta Gazan egonkortasuna mantentzeko eta berreraikuntza gainbegiratzeko behin-behineko nazioarteko indar bat eratzeari buruzkoak ere".

Trumpen planaren arabera, 2023ko urriaren 7an Israelgo lurraldean eraso egin zuenetik Hamasek bahituta dituen israeldar guztiak, bizirik nahiz hilda daudenak, askatzea da lehen fasearen helburua, Israelek ehunka palestinar aske uztearen truke. Izan ere, lehen fase horretan lan egingo dute Egipton egingo dituzten negoziazioetan.

Proposamenak Zerrenda desmilitarizatzea eta etorkizunean Palestinako Estatua ezartzea negoziatzeko aukera ere jasotzen ditu, Netanyahuk aukera hori baztertzen duen arren.

Iturri horren arabera, Hamaseko negoziatzaileek "bermeen eta gainbegiratze eraginkorraren beharra azpimarratzen dute, ziurtatu ahal izateko Israelek edozein akordio bete egingo duela, operazio militarrak eteteari eta Indarrak Zerrendatik erretiratzeari dagokienez, batik bat". Hamasen negoziazio-ordezkaritzak Khalil al-Hayya du buru. Al-Hayya onik atera zen joan den irailaren 9an bera eta taldeko beste kide batzuk Qatarren bilduta zeudela Israelek haien kontra egindako bonbardaketatik. 

Benjamin Netanyahu Israelgo lehen ministroak igandean agindu zion Ron Dermer Gai Estrategikoetarako ministroari ordezkaritzaren buru izateko, baina asteazkenera arte ez da Egiptora joango. Bateratsu iritsiko dira Steve Witkoff AEBko Ekialde Hurbilerako ordezkari berezia eta Jared Kushner Trumpen suhia ere, iturrien arabera.