Saharar autonomiarako Marokoren plana hartu du oinarri Segurtasun Kontseiluak, eta beste urtebetez luzatu du bere misioa

NBEko Segurtasun Kontseiluak Mendebaldeko Saharako erreferendumerako misioa urtebetez luzatzea erabaki du, baina eremua kolonizatuta duen Marokoren autonomia-plana oinarri hartuta.

11 herrialdek horren alde bozkatu dute, eta, inork beto eskubidea erabili ez duenez, AEBk egin duen proposamenak aurrera egin du. Aljeria, Txina eta Errusia abstenitu egin dira.

MINURSOren agintaldia gaur zen amaitzekoa, baina, plan hori onartu ostean, 2026ko urrira arte egongo da indarrean.

Mike Waltz AEBk Nazio Batuen Erakundean duen ordezkariak esan duenez, onartutako testua "guztien proposamenak barneratzeko ahalegin egiazko eta etengabearen emaitza izan da", eta bere herrialdeak "Espainiako kolonia ohiarentzat onargarria den irtenbide bat babesteko erabaki irmoa" duela adierazi du.

"Datozen asteetan mahaian esertzeko eta elkarrizketa serioetan parte hartzeko aprobetxa dezatela eskatzen diegu alde guztiei, Marokoren autonomia proposamena erabiliz, sinesgarria baita, eta hori baita konponbide justu eta iraunkor bakarra", gaineratu du.

Ahmed Attaf Aljeriako Atzerri ministroak esan du bere herrialdeak ez duela parte hartu ebazpen proiektuari buruzko bozketan, "deskolonizazio arloan Nazio Batuen doktrina behar bezala islatzen ez duen testu batetik aldentzen dela erakusteko".

Txinako ordezkariak, Fu Congek, esan du irtenbide politiko bat lortzea espero duela, eta horretarako NBEk "kanal nagusia" izan behar duela.

Ildo beretik, Vasili Nebenzia Errusiako ordezkariak abstentziora jotzeko bere erabakia azaldu du, "bake prozesuari beste aukera bat emateko asmoz". Hori dela eta, ebazpenak "kontrako eraginik" ez izatea espero duela erantsi du.

Gaur onartutako testuak "aldez aurreko baldintzarik gabe" elkarrizketak hasteko eskatzen die aldeei, "Mendebaldeko Saharako herriaren determinazio askea aurreikusten duen behin betiko irtenbide politiko onargarria" lortze aldera.

Hala ere, ebazpenak onartzen du "benetako autonomia bat emaitzarik egingarriena izan daitekeela", eta, beraz, alderdiak bultzatzen ditu "behin betiko konponbide onargarri baten aldeko ideiak aurkeztera".

1991n, NBEk Misioa hedatu zuen "Marokok eta Fronte Popularrak onartutako Hasierako Konponbiderako Planari" jarraikiz. Plan horretan, Mendebaldeko Saharako biztanleek lurraldearen etorkizuneko estatusa erabakitzeko aukera izango zuten, baina ez da egin.

Marokok "kapitulu berri bat" ireki du bere planari babesa eman ondoren

Mohamed VI .a erregeak adierazi duenez, Marokok "garaipenerako kapitulu berri bat" ireki du Mendebaldeko Sahararekin mende erdiko gatazka izan ondoren.

"Une erabakigarria eta inflexio-puntu erabakigarria bizitzen ari gara Marokoko historia modernoan: hemendik aurrera, 2025eko urriaren 31 baino lehen eta ondoren egongo da. Tangerretik La Güerara (Mendebaldeko Saharako iparraldeko muturra) hedatzen den Maroko batuaren unea iritsi da", esan du.

Testuinguru horretan, Tindufeko (Aljeria) errefuxiatu sahararren kanpalekuetan dauden pertsonei dei egin die "aukera historiko hau aprobetxa dezaten familiekin biltzeko eta Marokoren planaz baliatzeko". Izan ere, plan horrek "aukera ematen die beren aberria garatzeko eta Maroko batu batean etorkizuna eraikitzeko".