Marco Rubio, Trumpen bake planaren inguruan Ukrainako ordezkaritzarekin bildu ostean: "Dezente aurreratu dugu"

Europako segurtasun arduradunak Genevan (Suitza) bilduta dira igande honetan, Donald Trump AEBko presidenteak aste honetan Ukrainarako aurkeztutako bake plana Ukrainako eta AEBko ordezkariekin aztertzeko.

Ukrainaren ordezkariak hauek dira: Andrii Jermak Ukrainako Presidentearen Bulegoko burua, Rustem Umierov Ukrainako Segurtasun Nazionalerako eta Defentsarako Kontseiluko idazkaria, Kirilo Budanov Ukrainako Defentsa Ministerioko Inteligentzia Zuzendaritza Nagusiko burua eta Andrii Hnatov Indar Armatuen Estatu Nagusiko burua.

AEBren aldetik, Marco Rubio eta Steve Witkoff bake misioetarako ordezkari berezia ari dira elkarrizketetan parte hartzen, Dan Driscoll AEBko Armadako idazkariarekin batera. Driscoll larunbatetik dago bertan, ostiralean Etxe Zuriak gerrari amaiera emateko plana Kieven entregatu ostean Volodimir Zelenski Ukrainako presidentearekin hitz egin eta gero.

Ukrainak eta Europak planari ikusi zizkioten arazoak 

Planak "oinarri ona" duela esan diete europarrek estatubatuarrei, baina "lan gehiago" behar duela gai delikatuenetan, hala nola Donbass Errusiaren esku uzteko aukeren inguruan edo Ukrainako indar militarrak murriztearen inguruan.

Antonio Costa Europako Kontseiluko presidenteak, Ursula von der Leyen Europako Batzordeko presidenteak, Mark Carney Kanadako lehen ministroak, Alexander Stubb Finlandiako presidenteak, Emmanuel Macron Frantziako presidenteak, Micheal Martin Irlandako lehen ministroak, Georgia Meloni Italiako lehen ministroak, Sanae Takaichi Japoniako lehen ministroak, Keir Starmer Erresuma Batuko lehen ministroak, Friedrich Merz Alemaniako kantzilerrak, Jonas Gahr Store Norvegiako lehen ministroak eta Pedro Sanchez Espainiako Gobernuko presidenteak sinatu dute testua.

Rubio eta Yermak, Ukrainaren eta AEBren arteko lehen bileraren ostean: "Dezente aurreratu dugu"

Ukrainako eta AEBetako ordezkaritzek lehen bilera izan dute, eta, horren ostean, Marco Rubio Estatu Batuetako Estatu idazkariak ziurtatu du bi ordezkaritzek "aurrerapen handiak" egin dituztela Donald Trumpek Ukrainan bakea lortzeko duen bake planaren "puntuen banan-banako errepasoan".

Ukrainaren eta Errusiaren arteko gerrari amaiera emateko ahaleginen inguruan bi aldeek egin duten "bilerarik onena" izan daitekeela ere esan du.

Andri Yermak Ukrainako ordezkaritzaren burua bere ondoan zegoen Rubiok adierazpen horiek egin dituenean, eta ziurtatu du hasierako bilera "oso emankorra" izan dela. Bilerak ordu eta erdi inguru iraun du.

Yermak eskerrak eman dizkie "Estatu Batuei, Trump presidenteari eta bere taldeari, Ukrainara bakea ekartzeko egindako lanagatik", eta Europako herrialdeak, Ukrainaren aliatu handienak, ahalegin horretan inplikatzearen garrantzia nabarmendu du, AEBk bilera horietatik kanpo utzi dituen arren. "Bake iraunkor eta justu baterantz abiatzeko aurrerapen onak" egin dituztela gaineratu du.

Rubiok adierazi du negoziazio taldeak berriro bilduko direla Ukrainak planteatutako iradokizun batzuetan lan egiteko.

"Beraz, aldaketa eta doikuntza batzuk egiten ari gara, aurrera egiteko eta desberdintasunak murrizteko itxaropenarekin, Ukraina eta AEB eroso sentituko diren zerbaitetara hurbiltzeko", gaineratu du.

Rubiok, geroago, bigarren agerraldi batean jakitera eman duenez, "irekita jarraitzen duten gaiak ez dira gaindiezinak, gaur genuena baino denbora gehiago baino ez dugu behar. Zintzoki, akordio batera iritsiko garela uste dut ", adierazi die kazetariei.

Volodimir Zelenski Ukrainako presidenteak gaur gauean nazioari zuzendutako gaueroko mezuan esan duenez, "garrantzitsua da AEBetako ordezkariekin hitz egitea, eta Donald Trumpen taldeak entzuten gaituela uste dugu".

Zelenskik esan du "funtsezko elkarrizketak" izan direla egun osoan.

Europar Batasunak Ukrainan bakea bermatzeko izango duen zeregina "argi jasotzea" eskatu du Von der Leyenek

Ursula von der Leyen Europako Batzordeko presidenteak Ukrainarako bake akordioak Europar Batasunaren (EB) zeregin nagusia "erabat" islatu behar duela esan du igande honetan.

"Ukraina eztabaida askoren erdigunean egon da azken egunotan", esan du Von der Leyenek Johannesburgen, G20aren goi-bilera egin den tokian, eta "bake justu eta iraunkorra eta Ukrainaren subiranotasuna" lortzeko baldintzak jarri ditu. Horien artean, Von der Leyenek aipatu duenez, akordioan "erabat islatu behar da Europar Batasunaren zentraltasuna Ukrainan bakea bermatzeko".

"Esker txarrekoa" izatea egotzi dio Trumpek Zelenskiri eta hark eskerrak eman dizkio berriz ere

Testuinguru honetan, eta bere bake planak izan duen hasierako harrera "hotza" ikusita, Donald Trump Ameriketako Estatu Batuetako presidenteak esan du Volodimir Zelenski Ukrainako presidentea "esker txarrekoa" dela.

Truth Social plataforman zabaldu du "Ukrainako 'buruzagiek' ez dutela batera esker onik adierazi AEB egiten ari den ahaleginengatik, "Europak Errusiari petrolioa erosten jarraitzen duen bitartean".

Gainera, AEBko presidentearen hitzetan, Zelenskik "ez zuen mailarik eman" 2022an, Errusiaren inbasioa hasi zenean, ezta Joe Biden AEBko aurreko presidenteak ere; izan ere, horren iritziz, "Ukrainako eta Estatu Batuetako liderrak irmo agertu izan balira eta modu egokian jokatu izan balute, gerra ez zen inoiz hasiko".

Trumpen mezuaren ostean, eta tentsioa baretzeko asmoz, Volodimir Zelenski Ukrainako presidenteak eskerrak eman dizkie berriro AEBri eta, zehazki, Donald Trump presidenteari, "segurtasunaren alde egiten ari diren guztiagatik".

"Estatu Batuen lidergoa garrantzitsua da, Estatu Batuak eta Trump presidentea segurtasunaren alde egiten ari diren guztiagatik eskertuta gaude, eta ahalik eta modurik eraikitzaileenean lan egiten jarraitzen dugu", esan du X sare sozialean duen kontuan.

Halaber, Genevako gaurko bileran "emaitza praktikoa" izatea eta "Ukraina eta Europa osoa bake eta segurtasun fidagarrira hurbiltzea" nahi duela azpimarratu du.