Ozzy Osbourne hil da, Black Sabbath taldeko abeslaria, 76 urte zituela

Ozzy Osbourne, Black Sabbath taldeko abeslaria, 76 urte zituela hil da, "maitasunez inguratuta", haren familiak ohar baten bidez jakinarazi duenez. Parkinsona diagnostikatu zioten artista britainiarrak duela bi aste esan zion agur haren publikoari, Birminghamen (Ingalaterra erdialdean) eskaini zuen kontzertu ikusgarrian.

Ozzyk, britainiar talde ospetsuan parte hartuz, estilo bat sortzen lagundu zuen: Heavy Metala, nazioartean talde ugariri eragingo ziena. Tony Iommi gitarra-jotzailearen soinuak, alderaezina zen ahots baten oinarri ziren; alarde tekniko handirik gabe, eszenatokian ikusten zuen edonor mugiaraztea lortzen zuena.

"Ozzy Osbourneren heriotzaren berri eman behar dugu tristura handiz. Senideekin zegoen, maitasunez inguratuta. Horien pribatutasuna errespetatzeko eskatzen dugu", jakinarazi dute senideek oharrean.

Bere zaleek "Ilunpetako Printzea" eta "Heavy Metaleko Aitabitxia" bezala ezagutzen zuten, eta Black Sabbath taldean "Paranoid", "War Pigs" eta "Sabbath Bloody Sabbath" bezalako abesti arrakastatsuak interpretatuz ekin zion haren ibilbideari. Horrez gain, bakarka ere aritu izan zen. Guztira, 100 milioi disko baino gehiago saldu zituen mundu osoan.

Berebiziko indarra zuten abesti eta gaiak —depresiotik gerra eta apokalipsiaraino— jorratu zituen, antzerkirako senarekin uztartuta. Antza denez, 1982an fan batek agertokira bota zuen saguzar batekin izandako "topaketa" bezala. Beti esan zuen jostailu bat zela uste zuela, harik eta kosk egin zion arte, bere akatsaz konturatu zen arte. Bere esanetan, ospitalera joan zen amorruaren aurkako txerto bat jar ziezaioten. Geroago, saguzarren peluxeak saldu zituen.

Bere bizimoduaren inguruko iritzi zein kritikei iseka egin zien, benetako deabrua zela ziotenei bereziki.

"Gauza txar batzuk egin ditut nire bizitzan. Baina ez naiz deabrua. John Osbourne baino ez naiz: mutil langile bat, fabrikan zuen lana utzi eta dibertimendu bila jo zuena", esan zuen 2010eko biografia batean.

John Michael Osbourne sei semeetatik laugarrena izan zen eta Astonen hazi zen, Birmingham hirian, Ingalaterrako erdialdean. Dislexiaren aurka borrokatu zuen, eskola 15 urterekin utzi zuen eta gero Black Sabbath iritsi zen.

"Txikitan, nire kaleko beste mutilekin alderatu izan banindute, eta 60 urterekin gutako nor bost seme-alaba, lau biloba eta Buckinghamshire zein Kalifornian etxeak izatera iritsiko zen galdetu izan balidate, ez nuke sekula esango ni neu izango nintzela", adierazi zuen. 

Bere bizitzako azken etapak ikusgai izan ziren, 2002tik 2005era bitartean, haren familiarekin parte hartu zuen 'The Osbournes' izeneko 'reality show' ezagunean.

Uztailaren 5ean, Ozzy Osbourne berriro igo zen agertokira Black Sabbath taldearekin, "Back to the Beginning" emanaldi berezian zaleei agur esateko asmoz. Bere bakarkako garaiko bost abesti jo zituen, "Crazy Train" kasu, eta Black Sabbath taldeko lau; Iommi, Geezer Butler eta Bill Wardekin batera.

Besteak beste, Anthrax, Metallica eta Guns N'Roses taldeek jo zuten, baita Gojira ere, euskal metal bandarik ezagunena, eta Jack Black, Ricky Gervais eta Dolly Parton abeslari ezagunen esker oneko mezuak entzun ziren.