Sarako leizeak, ozenki marrumaka

Marmarra entzuten da dagoeneko, eta asteburuan marruma bihurtuko da hots hori, Sarako leizeetan, Marrumaka jaialdian. Bi egunez, larunbat-igandeetan, musika, dantza, erakusketak, tailerrak, dastatze-guneak eta animazioa izango dira.

Larunbatean goizetik, 10:00etan hasita, izango da zer egin, mitologiaren arabera Behigorri zezenak zaintzen zuen eremuan (hortik datorkio Marrumaka izena jaialdiari; hain ozen orro egiten zuen, ezen inor ez zen ausartzen kobazuloan sartzen): merkatua, ibilaldia, umeentzako jolasak… Eta 18:00etatik aurrera, This is the Kit, Mabe Fratti, Kaskezur, Los Sara Fontan eta Ezezez taldeen kontzertuak, 22 euroko sarrera ordainduta.