ETSk Bilbon emango duen kontzertua abuztuaren 25era aurreratu dute, ikuskizunetako teknikarien greba dela eta

Bilboko Aste Nagusiko kontzertuak ate joka dauden honetan, azken orduko aldaketa bat iragarri dute. ETS (En Tol Sarmiento) taldeak abuztuaren 26an eskaini behar zuen kontzertua abuztuaren 25ean egitea erabaki dute, datorren asteazkenerako ikuskizunetako teknikariek deitu duten grebaren aurrean errespetua eta elkartasuna erakusteaz gain. 

Horrela adostu dute Udalak eta musika taldeak, ostiral honetan ohar bidez eta sare sozialetan iragarri dutenez.

Azken egunotan, greba deialdia egin duten sindikatuen bozeramaileak ETS taldearekin harremanetan jarri dira deialdiaren arrazoiak eta testuingurua azaltzeko. Horren ondotik, ETSk kontzertuaren eguna aldatzeko eskatu zion Bilboko Udalari. 

Geroztik, ETS taldea eta Udala elkarlanean aritu dira, eta kontzertua abuztuaren 25era aurreratzea adostu dute azkenean. 

ETSk "elkartasuna eta errespetua" agertu dizkie greba deitu duten ikuskizunen sektoreko teknikariei, baita kultur zein musika alorrean jarduteko "behar-beharrezkoa" den kolektibo honen egoera eta aldarrikapenei "ikusgarritasuna" ematen lagundu ere.

"Kontzertu bakoitzaren atzean eszenatokira igo gaitezen ahalbidetzen duen profesional talde handi bat dago. Egoera honen aurrean, teknikarien sektorearekiko errespetua eta elkartasuna helarazi nahi dugu, baita langileek haien grebarako eskubidea askatasunez erabili dezaten lagundu ere", nabarmendu du taldeak. 

Teknikariok sindikatutik azken orduko aldaketa ospatu dute, izan ere, "beste agertoki bat hutsik geratuko da greba egunean, eta horrek argi erakusten du ikuskizunetako langileen batasunak duen indarra".

Gogorarazi dute helburua ez dela greba bera, Euki patronala lan baldintza duinak dituen hitzarmen bat lortzeko negoziatzera esertzeko tresna baizik.

Era berean, Bilboko Udalari adierazi diote beste aldera begiratzeari utz diezaiola "enpresa prekarizatzaileen" zerbitzuak azpikontratatzen dituenean. Izan ere, deitoratu dute sektore horrek prekarizatuta jarraitzen duela, "25 edo 26 izan. Eta, hain zuzen ere, azken orduko aldaketa honek sektore honetan eskatzen zaigun erabateko erabilgarritasuna islatzen du ".