Urkijoren kargugabetzea kritikatu dute PPk, PSEk eta UPyDk

PP, PSE eta UPyD alderdiek, argitaratu dituzten komunikatuetan, azalpenak eskatu dizkiote Iñigo Urkullu lehendakariari Txema Urkijo biktimen Eusko Jaurlaritzako aholkularia kargutik kentzeagatik. Eusko Jaurlaritzak, Josu Erkorekaren bitartez, amaitutzat jo du polemika Jonan Fernandez Bake eta Bizikidetza planaren idazkariak emandako azalpenekin.

Aresek gogoeta egiteko eskatu dio Urkulluri

Rodolfo Ares PSEko antolakuntza idazkariak Txema Urkijoren kargugabetzeaz gogoeta egiteko eskatu dio Iñigo Urkullu lehendakariari, “EAJ, PSE-EE eta PP alderdien artean lortutako akordioak ezerezean uzten dituelako”.

Urkijo kargutik kendu izana deitoratu du Aresek, Urkijo zelako “terrorismoaren biktimen eta Eusko Jaurlaritzaren artean zegoen azken lotunea”. Jaurlaritzak “biktimen kolektiboa laguntza eskatzeko erreferentzia gabe utzi du”, Aresen esanetan.

Kargugabetze honekin, “Maixabel Lasak urteetan biktimekin, alderdi politikoekin eta Espainiako Gobernuarekin josi izan dituen konfiantzazko lotura guztiak apurtu ditu lehendakariak”, gaineratu du.

Aresen ustez, lehendakariak erabaki hori hartzeko eman dituen argudioek argi erakusten dute “Urkulluk bertan behera utzi duela Patxi Lopezen garaian egindako lan guztia, baita Ibarretxerenean ere, biktimen zeregina zein izan behar zen ulertzen hasi zenean”.

'Biktimekiko keinu argiagoa ez egitea' deitoratu du PPk

“Biktimekiko keinu argiagoa” zergatik ez daukan azaltzeko eskatu dio PPk lehendakariari, Txema Urkijo biktimentzako Eusko Jaurlaritzaren aholkulari ohiak kargutik kendu zutenean salatu zuenaren haritik. Popularrentzat, Jonan Fernandezen alde eginda, Urkullu “erdibide kalkulatuan dabil, ezker abertzalea ez mintzeko”.

Parlamentuan ahoz erantzun beharrekoak izango diren galderen artean, PPk beste bat erregistratu du ostiralean, Urkijok “Gobernu honek terrorismoaren biktimekiko keinu argi bat egitea falta duela” esanez egindako adierazpenari erreferentzia eginez.

Adierazpen horrek “gizartean erreferente den talde batekiko jarrera jakin bat” dagoela erakusten dutela gaineratu dute popularrek, eta Eusko Jaurlaritzari terrorismoaren biktimekin “keinu aipagarri eta adierazkorrik zergatik izan ez duen argitzeko” eskatu diote.

Borja Semperren (PP) hitzetan, lehendakariak “aurpegia eman eta gertatzen ari dena azaldu behar du”.

UPyDk biktimei bizkarra ematen jarraitzeko asmoa duen galdetu dio Urkulluri

Gorka Maneiro UPyDko legebiltzarkideak Txema Urkijo kargugabetu ostean biktimei bizkarra ematen jarraitzeko asmoa duen galdetu dio Iñigo Urkulluri.

PPk egin bezala, Maneirok ere Urkijoren adierazpenak gogoratu ditu, eta lehendakariari biktimekiko 'keinu' adierazkor bat izateko eskatu dio. UPyD keinu hori “azkeneko urte eta erdian eskatzen ari dela” azpimarratu du.

“Gobernu honentzat terrorismoaren biktimak ikusezinak dira, badirudi ez direla existitzen. Horiei ez die arretarik jarri, baina dirutza eta esfortzu handia erabili du ustez indarkeria direnak parekatzeko beste kontu batzuekin”, gaineratu du.

Jaurlaritzak Jonan Fernandez babestu du

Josu Erkoreka Eusko Jaurlaritzako bozeramaileak, bestalde, Jonan Fernandezek atzo egin zituen adierazpenekin amaitutzat eman du Txema Urkijoren kargugabetzearen inguruan piztu den polemika. “Gobernuak ez du ezer gehiago esatekorik”, adierazi du Justizia sailburuak.

Urkijok Jaurlaritzari egindako kritiken inguruan ere galdetu diote kazetariek. “Jaurlaritzak atzo eman zuen bere iritzia, eta esan beharrekoa esan zuen Jonan Fernandez Bake eta Bizikidetzarako idazkariaren hitzekin”, esan du.