Sakabanaketaren inguruko txosten ekonomikoa aurkeztu du Etxeratek

Etxerat euskal presoen senideen elkarteak elkarretaratzea egin du Loiolako Basilikaren atarian, xede izanik euskal presoen sakabanaketa salatzea. Gauzak horrela, 100 bat kide bildu dira bertan, eta presoen itzulera eskatu dute hainbat kartelen bitartez. Gainera, 'euskal presoak, etxera' oihuak ere bota dituzte.

Loiolako San Inazioren omenez, meza egin dute Loiolako Basilikan, Azpeitian, eta bertan hainbat agintari politiko izan dira, tartean, Arantxa Tapia Garapen Ekonomikorako sailburua, Ana Oregi eta Ricardo Gatzagaetxebarria sailburuak, Eusko Legebiltzarreko eta Batzar Nagusietako presidenteak (Bakartxo Tejeria eta Eider Mendoza), eta Eneko Etxeberria Azpeitiko alkatea.

Agintarien presentziaren harira, Etxeratek presoen sakabanaketaren inguruko txostena eman die Eusko Jaurlaritzako agintariei. Urrutian preso dauden senideei eta adiskideei egin beharreko bisitek zer nolako dirutzak eraman dituen azpimarratu dute Etxeratekoek.

Gainera, sufrimendu fisikoa, psikologikoa eta ekonomikoa salatu dute, eta dispertzioarekin amaitzeko deia egin diete agintariei.