CUPek Generalitateko aurrekontuak babestea erabaki du

CUP alderdiak Kataluniako Generalitateko 2017ko aurrekontuak babestea erabaki du, Kontseilu Politikoak eta Jarduera Parlamentariorako taldeak larunbat goizean egindako bileran: 39 boto alde, 22 aurka eta bi abstentzio.

Erabaki horri esker, kontuak onartzeaz gain, Generalitateko presidenteak egindako adierazpen polemikoen ostean ezbaian jarritako prozesu subiranoa ere indartuko dute. Izan ere, "cupaires"ek (CUPeko kideek) aurrekontuak onartu ezean, hauteskundeak deituko zituela azaldu zuen Puigdemontek.

CUPen baiezkoa Kataluniako Gobernuak CUPek hezkuntza-politikaren inguruan eta Hiritarrei Bermatutako Errentaren inguruko zenbait eskaera onartu ostean iritsi da. Zerga-politikari buruzko eskatutako aldaketak, ordea, ez dituzte burutu.

"Alde bozkatu dugu, baina ez gizarte-edukiagatik, erreferenduma egiteko bidea libre uzteko asmoz baizik", esan du Quim Arrufat CUPeko Idazkaritza Nazionaleko bozeramaileak Kontseilu Politikoaren bileraren ondoren. Eulàlia Reguant alderdikideak azaldu duenez, ez daude kontuekin ados, eta otsailaren 8an eta 9an Parlamentuan onartu arte Kataluniako Gobernuarekin negoziatzen jarraitzea espero dute.

Arrufaten esanetan, aurrekontuak onartuko dituzte baiezko bi boto eta zortzi abstentzio emanez, baldin eta erreferenduma egiten bada iraila baino lehen: "Irailean ez badago erreferendumik, CUPek babesa ukatuko dio Kataluniako Gobernuari", azpimarratu du, zentsura-mozioa baztertu duen aldi berean.