Legezko bideak jorratuta, herritarren babesa bilatuko du EPPK-k

"Askatasuna eskuratzeko asmoz", Euskal Herriko herritarrekin "legezko bidea" partekatzeko asmoa erakutsi du EPPK Euskal Preso Politikoen Kolektiboak, larunbat honetan Naiz kazeta digitalak aurreratu duenez. EPPKren agiria, osorik, igande honetan argitaratu du Gara egunkariak.

Barne-eztabaidaren fase berria osatu du EPPK-k, eta horren ondorioak islatu ditu ondorioen dokumentuan. "330 presoren egoerari irtenbidea" bilatzeko jorratu behar diren legezko bideak zehazten ditu agiri horrek.

Helburua ''kolektiboa bera murriztea'' da, eta ''kartzelak husteko bidean emandako urrats oro'' ontzat emango luke EPPK-k: ''Ontzat emango genuke batze oro, hurbiltze oro eta kaleratze oro; batzea partziala izanda ere, hurbiltzea Euskal Herriratzea ez izanda ere, kaleratzea behin betikoa ez izanda ere''.

Presoek euren egoera juridikoaren berri emango diete herritarrei, gero urratsak egiteko, haien babesa lortzeko eta prozesua partekatzeko. Lehenik, euren abokatuekin jorratu beharreko legezko bide indibidualak aztertuko dituzte (txosten juridiko batean jasoko dituztenak); geroago, emango dituzten urratsak aukeratu; eta, azkenik, herritarren eta EPPK kolektiboaren babesa bilatuko dute.

Legezko bide desberdinak

Agirian adierazi dutenez, ''ildo juridikoa eta kartzelaren erasoen aurrean eman beharreko erantzunak nola uztartu izan da kezka nagusienetakoa, baina baita ere ildo juridikoan sakontzerakoan kide bakoitza kartzela agintarien xantaiaren menpe geratzeko arriskua edota Kolektiboaren sailkapen berriak egiteko aukera berriei atea irekitzearena''.

''Preso bakoitzaren egoera juridikoaren arabera ildo juridikoan aukera desberdinak egongo dira. Norbera izango da ildo juridikoak eskaintzen dituen aukera horiei heltzea edo ez erabakiko duena, preso bakoitzak erabakiko du egin daitezkeen eskaera edo bide legal ezberdinei heltzea edo ez heltzea (errendentzioak, kartzela destinoak, graduen aldaketa, baimenak, baldintzapeko askatasuna, etab), eta bide horretan ondorenean zehazten den prozeduraren arabera EPPKren babesa eta laguntza izango du kide horrek''.

Preso bakoitza bere txosten juridikoaz jabetuko da, eta txosten juridiko horren azterketa burutuko du EPPK-k legelarien laguntzaz, gaur egungo legediaren arabera zer nolako aukerak egon daitezkeen jakiteko. Bakoitzaren txosten juridiko eta penal hori osatu ostean, ''lehenik kolektiboaren zuzendaritzari ezagutaraziko diogu eta, ondoren, herritarrei, herrietan jakin dezaten zein den gure egoera eta zeri egin behar diogun aurre denon artean''.

Ondoren, ''preso bakoitzaren esku egongo da zer nolako urratsa egingo duen erabakitzea. Norberak bere batzarrari egin asmo dituen izapideen berri emango dio Kolektiboaren oniritzia eta babesa jasotzeko'', adierazi dute.

Malgutasuna

Gainera, "torturen bidez lortutako deklarazioetan oinarritutako auziak berrikusteko" eskatu du EPPK-k. Horren iritzian, prozesua "atzeraezina da, eta malgutasuna eskatzen du". Preso guztiak kaleratzea aldarrikatzen du EPPK-k agirian. ''Gure espetxeratzeak irauten duen egun bakoitzak gatazka elikatzen du, konponbidea urruntzen du. Guztion kaleratzea izanik gure iparra, gaur egun bizi dugun deserriratzea eta sakabanaketarekin amaitzeko erreferentzia gisa, Estatu espainiarrari begira Zaballako kartzelan eta Estatu frantsesari begira Mont de Marsanekoan berbatzea aldarrikatuko dugu''.

Helburua ''kolektiboa bera murriztea'' da, eta ''kartzelak husteko bidean emandako urrats oro'' ontzat emango luke EPPK-k, beti ere, ''kidegoaren adostasunez eta herritarren laguntzarekin. Beraz, kartzelak husteko prozesu baten baitan kokatuta egotekotan, hau da, soilik guztion kaleratzea helmuga duen prozesu dinamiko baten baitan, ontzat emango genuke batze oro, hurbiltze oro eta kaleratze oro; batzea partziala izanda ere, hurbiltzea Euskal Herriratzea ez izanda ere, kaleratzea behin betikoa ez izanda ere''.

EPPK-k argi utzi nahi izan du ''gure militante izatearen aurka doazen eskabide politikorik edota politikoki askapen prozesuari kalte egiteko erabili daitezkeen urratsik'' ez dutela onartuko: ''Inork ez diezagula eska ez damu politikorik ez beste kideen zigorra luzatzeko edo espetxeratzeko kolaboraziorik. Konfrontazio armatuaren aldia itxi nahi da Euskal Herrian, eta, etorkizunerako aukera honekin ados egonik, inork ez diezagula eska gure ideiei eta gure helburu politikoei uko egitea. Kasu guztietan, Kolektiboaren eta herritarren babesa eta laguntza bilatuko dugu, ibilbidean zer nolako oztopoak jartzen dizkiguten jakinaren gainean egon daitezen''.

EPPK-ren esanetan, ''prozesu independentista abian jartzeak preso politikoon izaera eta funtzioa aldatuko du, nabarmenduko delarik Euskal Herriaren independentzia prozesua oztopatzeko bahitu politiko gisa atxikitzen gaituztela Estatuek''.

Zuzendaritza berria

Azkenik, agirian jaso dute presoen kolektiboak zuzendaritza berria aukeratuko duela urrian, eta zuzendaritza berri horrek lotura zuzena izango duela ezker abertzalearekin eta independentziaren alde lan egiten duten euskal elkarteekin. ''EPPKren binkulazio politiko zuzena ezker abertzalearekin izango da'', baina ''kolektibo gisa bere ahots propioa izango du dagozkion gaietan''.