Carles Puigdemont eta bost kontseilari Bruselan daude

Carles Puigdemont presidentea Bruselan dago, Paul Bekaert abokatu belgikarrak baieztatu duenez. Flandriako hedabide publiko VRTk aurreratua zuen "abokatuekin eta arduradun politikoekin" biltzea aurreikusten zuela Puigdemontek.

Ordu batzuk geroago, Paul Bekaert abokatu belgikarrak baieztatu du presidentak "aholkulari" gisa kontratatu duela. Bekaertek esperientzia du euro-agindu prozesuetan, Natividad Jauregi ETAko ustezko kidearen abokatu ere izan baitzen, eta Belgikak ez Espainiaratzea lortu zuen. Era berean, aditua da giza eskubideen eta asilo eskaeren kontuetan.

"Berekin hitz egin dut aurrez aurre. Elkarrizketa Belgikan izan da, baina ezin dut ezer gehiago esan", adierazi du abokatuak VRTn. Puigdemontek "bere interesak Belgikan defendatzeko" eskatu omen dio Bekaerti.

Presidentearekin batera Bruselara joandako kargugabetutako kontseilariak Joaquim Forn, Meritxell Borras, Meritxell Serret, Dolors Bassa eta Antoni Comin dira. Kataluniatik Marsellara autoz eta handik Bruselara hegazkinez joan omen dira.

Jose Manuel Maza Estatuko Fiskal Nagusiak iragarri du astelehen honetan Fiskaltzak kereila jarriko zuela Auzitegi Nazionalean, Puigdemont eta Kataluniako Gobernutik kargugabetutako kontseilarien aurka, matxinada-delituagatik, sedizioagatik eta dirua bidegabe erabiltzeagatik. Mazak hori iragarri eta ordubetera eman dute jakitera Puigdemont Bruselan dagoela.

Gaur goizean bertan, Puigdemontek Generalitatearen Jauregian hartutako bi argazki argitaratu ditu Instagram sare sozialean; ez du zehaztu, baina, noiz hartu dituen bi argazki horiek.

Kontsultatutako iturriek ez dute azaldu zer dela eta dagoen Puigdemont Bruselan; hori bai, Theo Francken Belgikako Migrazio eta Asiloko Belgikako Estatu idazkariak, N-VA alderdi independentista flandestarreko kidea bera, esan zuen igandean Twitterreko bere kontuan Puigdemontek aukera duela Belgikan “asilo politikoa” eskatzeko.

Hala ere, Belgikako Gobernu federalak eta Flandriako exekutiboak ez dute adierazpen ofizialik egin. "Zurrumurruak dira", eman dute aditzera N-VA alderditik.

Charles Michel Belgikako lehen ministroak berehala baztertu zuen aukera hori; esan zuenez, Kataluniako presidentearentzako asiloa "ez dago Belgikako Gobernuaren gai-zerrendan".

La Vanguardia egunkariaren arabera, baliteke bihar agerraldia egitea guztiek batera.

"Jazarpen seinale fidagarriak" beharrezkoak dira

Dirk Van den Bulcke Belgikako errefuxiatu eta herrigabeentzako komisario orokorrak esan duenez, beharrezkoak dira "jazarpen edo arrisku seinale fidagarriak" jatorrizko herrialdean Belgikako estatuak herritar europear bati asiloa aitortzeko.

"Jazarpen seinale fidagarrik egon behar dira, baina jazarpen kasuan ere, herrialdean babesa lortzeko ezintasuna ere beharrezkoa da", argitu du RTL telebistan.

Europar Batasuneko herritarrei asiloa emateko prozedura bat aurreikusten du Belgikak.

Atzerritarren Bulegoak jasotzen ditu eskaerak, eta Errefutxiatu eta Herrigabeentzako Komisariotza Orokorrari helarazten dizkie. Bost egun ditu helegiterik jarri ezin zaion erabakia hartzeko. "Eskatzailearen adierazpenean ez bada argi geratzen jazarpenari beldur oinarriduna diola edo kalte serioak izateko benetako arriskua duela", eskaera atzera bota dezake erakundeak.

Azken hamar urteetan, Eslovakiako eta Errumaniako ijitoen gutxiengoek prozedura hori erabili dute, baina ez dute erantzun positiborik jaso.

Lluis Llachentzat, "erbestean" dago Puigdemont

Lluis Llach kantautoreak, Junts pel Sí-ren diputatu ohiak, "erbesteratutako Kataluniako Errepublikako presidentetzat" hartu du Carles Puigdemont, eta Bruselara egindako bidaia Estatuaren aurkako "salaketa" dela esan du.