Pedro Sanchez, Espainiako Gobernuko presidente berria
Pedro Sanchez PSOEko idazkari nagusia Espainiako Gobernuko presidente karguan ezarri dute, ostiral honetan, Mariano Rajoy PPko buruaren aurkako zentsura-mozioa aurrera atera ostean, Diputatuen Kongresuan.
Behe Ganberak baiezkoa eman dio Sanchezen zentsura-mozioari, aldeko 180 boto (PSOE, Elkarrekin Podemos, ERC, EAJ, PDeCat, Compromis, EH Bildu eta Kanariak Berriak), 169 kontra (PP, Ciudadanos, UPN eta Foro) eta abstentzio bat (Kanarietako Koalizioa) jasota.
Demokrazian aurrera egiten duten lehen zentsura-mozioa da, azken berrogei urteotan aurkeztutako hiruen ostean. Adolfo Suarez, Felipe Gonzalez eta Mariano Rajoyren aurka izan dira. Rajoyren aurkakoa duela urtebete aurkeztu zuen Podemosek, Pablo Iglesias burua hautagai izanda.
Espainiako Gobernuko presidentea diputatua ez den lehen aldia ere bada, beraz, ezin izan du bere burua bozkatu, eta legealdian geratzen diren Ganberako beste osoko bilkuretan ere ezin izango du egin.
Bozketa
Araudiari jarraituz, zentsura-mozioari buruzko bozketa, inbestidura saioetan izaten den bezala, publikoa da eta deialdien bitartez egiten da, hau da, diputatuei deitzen zaie, haien eserlekuan zutik jarrita botoa altu esan dezaten.
Bozketaren hasiera zozketa bidez egin dute, eta, kasu honetan, Irene Rivera Ciudadanoseko diputatuarekin hasi da; deitu dutenean, 'Ez' esan dio Pedro Sanchezi.
Bi egunetan banatutako 12 ordu baino gehiagoko eztabaidaren ostean, Kongresuko diputatuak tente jartzen joan dira haien botoa iragartzeko. EH Bilduri tokatu zaionean, koalizioak euskaraz bozkatu du.
Amaieran, Ana Pastor Kongresuko presidenteak emaitzen berri eman du.
Zorion-agurrak
Saioa amaitzean, Ana Pastor Kongresuko presidenteak eskerrak eman dizkie Rajoyri eta Sanchezi, biei begiratuz "eskerrik asko, presidente" esanez.
Segidan, PSOEko aulkia txalo-zaparrada jotzen ari zen bitartean, Rajoy Sanchezen eserlekura gerturatu da, eta eskua eman dio; horren ostean, hemiziklotik irten da.
Mariano Rajoy Pedro Sanchezi eskua ematen. EiTB
Sanchezek Ana Pastorren zorionak ere jaso ditu, baita Pablo Iglesias Podemoseko buruarena, Albert Rivera Ciudadanoseko presidentearena eta Aitor Esteban EAJren bozeramailearena ere, besteak beste.
Espainiako Gobernuko presidente berriak zorion-agurrak jasotzen zituen bitartean, eta sozialisten txalo artean, Podemoseko diputatuek haien alderdiko kontsigna esan dute batera, "bai, ahal da".
Sanchezen lehen adierazpenak
Pedro Sanchezek esan duenez, hartzen duen erantzunkizunaren eta une politiko "hain konplexua"ren jabe da, eta herrialdeak dituen erronka guztiei "borondatez eta determinazioz" egingo die aurre, baita adostasunetik ere.
Kongresuko korridoreetan egindako adierazpenetan, bere alderdiak aurkeztutako zentsura-mozioak arrakasta izan ostean, Sanchezek adierazi du aurretik dauden erronken "oso kontziente" izateaz gain, herrialdea "eraldatu eta berriztatu" nahi duela, "gobernu sozialistek beti egin ohi izan duten bezala", gaineratu du.
Bigarrenik, "ezegonkortasuna eta berdintasunik eza" sufritzen duten pertsona askoren "larrialdi sozialei" arreta jartzen zentratuko da.
Hori guztia, "adostasunetik, eta umiltasun askorekin", azaldu du Sanchezek. Halaber, presidente lanetan guztiz murgilduko dela nabarmendu du, "herrialdeak merezi duena hori delako".
Rajoyren agurra
Mariano Rajoyk Espainiako presidente karguari agur esan dio ostiral honetan. "Ohorea izan da Espainia aurkitu nuena baino hobeto utzi izana", esan du.
Rajoyk zorionak eman dizkio Pedro Sanchezi, eta "demokrata gisa" zentsura-mozioaren emaitza onartzen duela baina "egindakoa" babesten ez duela esan du.
Prozesua
Kongresuaren bermea jaso ostean, Ana Pastor Ganberako presidenteak Espainiako erregeari jakinarazi beharko dio Kongresuaren erabakia, eta Mariano Rajoyren Gobernuak dimisioa aurkeztuko dio erregeari, Konstituzioko 114.2 artikuluak ezartzen duen moduan.
Une horretan, Pedro Sanchez Ganberaren konfiantzaren jabedun joko da, eta, gero, erregeak Espainiako Gobernuko presidente izendatuko du.
Aurreikuspenen arabera, izendapena larunbat honetan argitaratuko dute Estatuko Aldizkari Ofizialean, eta litekeena da egun horretan bertan Sanchezek Felipe VI.aren aurrean kargua hartzea.
Zure interesekoa izan daiteke
30 urteko kartzela-zigorra eskatu dute ETAko bost buruzagi ohirentzat Gregorio Ordoñez hiltzeagatik
Akusatuek ETAko buruzagitza osatzen zuten, eta 1995eko urtarrilean Donostiako PPko zinegotzia hiltzea erabaki zuten, Fiskaltzaren idazkiaren arabera.
Elkarrekin Donostia afari solidarioen debekua helegite bidez auzitan jartzea aztertzen ari da
Araua neurrigabea dela eta zalantzazko oinarri juridikoak dituela uste du koalizioak. EH Bilduk, berriz, Kaleko Afari Solidarioak plataformako boluntarioen aurkako "jazarpena" salatu eta debekua bertan behera uzteko eskatu du.
Robles, Marlaska, Bolaños eta Albares Kongresuan agertuko dira abuztuaren amaieran, Ceutako migrazio-krisia dela eta
Espainiako Gobernuak lau ministroen ezohiko agerraldiak eskatu ditu, uztailaren 30ean Ceutan hasitako migrazio-krisiaren kudeaketaren berri emateko.
EAE adingabe migratzaileak hartzeko Estatuak ezarritako kupoaren gainetik dago, eta Nafarroa, berriz, azpitik
Arabak, Bizkaiak eta Gipuzkoak 843 adingabe atzerritar artatzen dituzte egun, berez dagokiona baino 65 gehiago. Aldiz, azken datuen arabera, Foru Erkidegoa bere gaitasunaren % 30 inguruan dago.
Ceutako migrazio krisiaren aurretik alertak jaso zituen ala ez galdetu dio epaileak Guardia Zibilari
Iustitia Europak jarritako salaketaren ondorioz abiarazi ditu izapideak Auzitegi Nazionalak, eta bizi direnen eta hildakoen kokapenari buruzko informazioa eskatu du.
Melgosa: "Estatuaren lehen betebeharra da adingabeak familiekin itzultzeko bideak agortzea"
Eusko Jaurlaritzako Berdintasun, Justizia eta Gizarte Eskubideetako sailburuak nabarmendu du ez zaiola "zentzuzkoa iruditzen lehen erantzuna (Espainiako Gobernuarena) adingabe horiek (Ceutan daudenak) beren familietatik urrun, milaka kilometrotara, eramatea".
Grande-Marlaska eta Robles kargugabetzea eskatu du Telladok: "Ceutan gertatu den guztiaren erantzuleak dira"
Miguel Tellado Alderdi Popularraren idazkari nagusiak, Gasteiztik, Fernando Grande-Marlaska Espainiako Gobernuko Barne ministroa eta Margarita Robles Defentsa ministroa kargugabetzea eskatu du, Ceutako migrazio krisiaren aurrean ez dutelako "ezer egin".
Gizon bat atxilotu dute, Bilbon Cake Minuesaren kontrako derrigortze eta gorroto delituak egitea egotzita
Okdiario hedabideko kazetaria Mundialeko finalaren egunean Bilbon egiten ari ziren euskal selekzioaren aldeko manifestazio batean zegoen.
Ceutan sartu ziren 72.000 pertsonetatik 70.000 Marokora itzuli direla ziurtatu du Marlaskak
Migrazio-krisi honetan hiri autonomora iritsi diren adingabeei premiazko arreta emateko, Espainiako Gobernuak 25 milioi euroko partida gehigarri bat bideratuko du Ceutara.
Zapaterok errekurritu egin du haren kontuak eta haren gertukoenak ikertzeko epaileak emandako agindua
Espainiako Gobernuko presidente ohiaren defentsak ohartarazi duenez, banku-kontuak ikertzeko baimen "orokor" batek "ikerketa prospektibo" bati bide eman diezaioke.