Sanchezek ez du Kongresuaren babesik lortu presidente izateko
Pedro Sanchez hautagai sozialistak ez du Kongresuaren babesa lortu Espainiako Gobernuko presidente izateko astearte honetan diputatuek egin duten bozketan.
Sanchezek gehiengo osoa behar zuen presidente izendatzeko, baina ez du boto kopuru nahikoa lortu: aldeko botoak 124 izan dira; kontrakoak 170; eta 114 abstenitu egin dira.
Hori horrela, PSOEren 123 botoak eta Kantabriako Alderdi Erregionalistaren (PRC) diputatuarenak soilik eskuratu ditu. PP, Ciudadanos, Vox, Esquerra Republicana (ERC), Junts, Coalicion Canaria (CC) eta Union del Pueblo Navarro (UPN) kontra agertu dira, baita Irene Montero Unidas Podemoseko Kongresuko bozeramailea ere. Gainerako alderdiak, Unidas Podemos, EAJ, EH Bildu eta Compromis abstenitu egin dira.
Hortaz, 52 boto falta izan zaizkio Sanchezi gehiengo absolutua lortu eta inbestidura aurrera atera ahal izateko.
Meritxell Batet Kongresuko presidenteak bilkura berria deitu du datorren ostegunerako, uztailaren 25erako, bigarren bozketa egiteko. Orduan, Sanchezek aldeko botoak kontrakoak baino gehiago izatea nahikoa izango du presidente bilakatzeko.
Inbestidurako hirugarren saioa 13:30ean hasiko da Kongresuan. Lehendabizi, Sanchezek hartuko du hitza eta hamar minutuko agerraldia egingo du. Talde parlamentarioetako bozeramailek, berriz, bost minutu izango dituzte zer bozkatuko duten azaltzeko.
Agerraldiak amaituta, bozketa 14:25ean egingo dute. Gaurkoan bezala, diputatuek ahoz emango dute botoa. Espainiako Gobernuko jarduneko ministroak eta Kongresuko Mahaiko ordezkariak izango dira bozkatzen azkenak.
(Pedro Sanchez eta Carmen Calvo Kongresuko eztabaidan. Argazkia: EFE)
Inbestiduraren bigarren saioan, Gabriel Rufian ERCren bozeramailea izan da hitza hartzen lehena. Rufianek estu hartu du Pedro Sanchez hautagai sozialistak atzokoan eduki zuen jarrera. Kritikatu duenez, PSOEko buruzagiak ez zuen "hitzerdirik ere" esan "Kataluniako gatazkari" buruz eta, aldi berean, PPren eta Ciudadanosen abstentzioa eskatu zuen.
"Arduragabe eta zuhurtziagabea izan zinen atzo. Arduragabe hutsa zara ala hauteskundeak nahi dituzu, ez dakit zer den okerragoa", deitoratu du.
Halaber, eta Unidas Podemosi aipu eginez, Rufianek salatu du Sanchezek ezikusiarena egin zuela bere "balizko bazkideekin".
Nolanahi ere, talde errepublikanoaren bozeramaileak elkarrizketarako deia egin du: "Hitz egin behar dugu, eta berriro hitz egin". Izan ere, Rufianen hitzetan, "ulertzera kondenatuta gaude". Azkenik, Unidas Podemosi eta PSOEri zuzendu zaie: "48 ordu dituzue. Historia zuei begira dago, borobildu du.
Aitor Esteban EAJko diputatuak ausarta izateko eta Unidas Podemosekin akordioa egiteko eskatu dio Sanchezi: "Eman ezazu aurrera pauso bat, malgua eta irmoa, beldur barik".
Gehiengoa ez duen presidentegai batek babesak bilatu behar dituela eta horretarako zerbait eman behar dela gogoratu dio Estebanek Sanchezi.
Ildo horretan, zehaztu du ez daukala PSOEren eta Unidas Podemosen arteko negoziazioari buruzko informaziorik, baina bi talde horien arteko itunik ez egoteko presioak adostasunetara heltzeko aitzakia ezin daitezkeela izan erantsi du.
Segidan, Mertxe Aizpurua EH Bilduko ordezkaria mintzatu da. Koalizio soberanistaren abstentzioa "txeke zuri bat" ez dela ohartarazi dio Sanchezi; izan ere, "ezetz esateko arrazoi asko ditugu".
EH Bildu Euskal Herrian bigarren indar politikoa dela eta udaletan ordezkari gehien duen talde politikoa dela azpimarratuta, koalizio soberanistari ezartzen dioten "apartheid politikoa" salatu du Aizpuruak. "Zentsura-mozioak aurrera egin zezan edo Espainiako Gobernuaren dekretu sozialak onartzeko erabakigarriak izan ginen", gogoratu du.
Horrez gain, iraganean PSOErekin, Alderdi Popularrarekin eta EAJrekin hainbat akordio egin dituztela nabarmendu du.
Espainiako Estatua "sistema krisi batean" sartuta dagoela ohartarazi du eta horren erakusgarri diren arazo sozialak aipatu ditu: pentsioen sistema, langabezia, prekarietatea eta lurralde antolaketaren krisia.
Laura Borras Junts per Catalunya (JxCat) taldeko bozeramaileak azpimarratu du "155 arrazoi” dituztela “Sanchezen inbestiduraren kontra bozkatzeko". Borrasek Katalunian bizi duten "errepresioa" salatu du: "Ia 1.000 auzipetu eta preso politiko ugari ditugu".
"Sekulako lupetza duzu, eta etorkizun hurbilean dituzun gertakarien menpe zaude: lotsaren epaiketaren epaia, batetik, 2018ko abuztuko atentatuen inguruko ikerketa batzordea, bestetik. Fairy asko beharko duzu lokatz hori guztia garbitzeko", esan dio Sanchezi.
Sergio Sayas Navarra Suma koalizioko ordezkariak gobernua "edonorekin eta edozelan" osatu nahi izatea egotzi dio Pedro Sanchezi. Sayasen ustez, "abertzaleak ez dira bidaide onak Espainiako zein Nafarroako gobernuetan".
Zure interesekoa izan daiteke
Laugarren xedapen iragankorra indargabetzeko tramitea hasi du UPNk
Cristina Ibarrola UPNren presidenteak lege-proposamen bat aurkeztu du Nafarroako Parlamentuan: Konstituzioa erreformatzea eta xedapena ezabatzea eskatu nahi die Gorte Nagusiei.
Eneko Andueza: “Osasun Ministerioari elkarrizketa gehiago izatea eskatu behar zaio, grebari amaiera emateko”
Eneko Andueza PSEren idazkari nagusia kritiko agertu da Monica Garcia Osasun ministroarekin, medikuen grebaren harira. Adierazi duenez, Osasun Ministerioak “elkarrizketa gehiago eta lankidetza” sustatu behar ditu grebarekin amaitzeko. Bestalde, Euskadi Irratiko "Faktoria" saioan adierazi du ez duela “inolako aukerarik ikusten” EH Bildurekin akordio batera heltzeko euskara Administrazioan arautzen duen legearen inguruan. “EH Bildurekin ez dago tarterik, eta, EAJrekin, ikusteko dago”.
Javier De Andres: "Euskararen exijentzia maila euskal gizarteak benetan eskain dezakeenaren gainetik dago"
Euskadiko PPren presidentearen arabera, "eskatzen den euskara maila euskal gizarteak benetan eman dezakeena baino handiagoa da. Ez dago abokaturik, ez dago osasun-langilerik, ez dago gai jakin batzuetan eskatzen den kualifikazio profesionala duen langilerik, eta, gainera, euskara eskakizuna egiaztatuta duenik", eta horrek langile publikoen behin-behinekotasun tasak areagotzen ditu. Haren ustez, "arazoa da nazionalismoaren eskakizun ideologikoak euskal gizarteak Administrazioan euskararen arloan benetan bete dezakeenaren gainetik" daudela.
Sanchezek Aznarren aurka egin du Espainia Irakeko gerran sartzeagatik, eta Iranekin "akats bera ez egitea" eskatu du
Espainiako Gobernuko presidenteak ohartarazi du Iran Irak baino askoz ere indartsuagoa dela militarki eta ekonomikoki, eta gerraren ondorioak larriagoak izango direla adierazi du.
GOIDIa ikertzen duen epaileak Mazon lekuko gisa deklaratzera deitu du
Horrez gainera, "borondatez" egun hartako telefono-deien zerrenda eta mezuak ikerketarako emateko eskatu dio. Biktimek espero dute presidente ohiak egia esateko "ohorea" izango duela oraingoan.
Marisol Iparragirre "Anboto"-ri espetxe araudia aplikatu zaiola esan du Ubarretxenak
Eusko Jaurlaritzaren bozeramaileak azaldu duenez, Iparragirrerekin gainerako presoekin jokatzen duten moduan jokatu dute, eta adierazi du dela inolako neurri berezirik hartu. Aipatu du ulertzen dutela ETAren biktimei eragiten dien mina. Hala ere, gogorarazi du neurri horrek gizarteratzea duela helburu. Marisol Iparragirre Martuteneko kartzelatik atera da astearte honetan, erdi-askatasuneko erregimenean: astean zehar egunez irten ahal izango da espetxetik, lan egiteko, eta gauean itzuli beharko du. Asteburuetan ez da aterako.
Autonomo txikiak BEZetik salbuestea da Juntsek jarri duen baldintza, krisiaren aurkako dekretua babesteko
Miriam Nogueras Juntsek Diputatuen Kongresuan duen bozeramaile aurreratu du krisiaren aurkako dekretuaren alde bozkatuko dutela, baldin eta PSOEk neurrien artean sartzen badu 80.000 euro baino gutxiago fakturatzen duten autonomoek BEZ zerga ez ordaintzea.
Eusko Jaurlaritzak adierazi du EHUk iragarritako protokoloa “labur" geratzen dela “mehatxu-jarrerei” aurre egiteko
Juan Ignacio Pérez Iglesias sailburuak jarrera horien ardura duten taldeak ez aipatzea aurpegiratu dio Errektoretzari, eta IAS aipatu du.
Diez Antxustegik beharrezko ikusten du Tubos Reunidosen "zorra berrantolatzea", eta industria indartzeko deia egin du: "Gure babes soziala da"
EAJren Eusko Legebiltzarrerako bozeramaileak, Joseba Diez Antxustegik, Radio Euskadin azpimarratu du Tubos Reunidos enpresaren zorra “berrantolatzeko” beharra, irtenbidea emateko. “Merkatua badu, baina likidezia arazoak ditu”, adierazi du. Horrekin batera, nazioarteko egoera zailaren aurrean industria bultzatzearen beharra nabarmendu du: “Euskadin, gure babes soziala gure babes industriala da”. Azkenik, euskararen kudeaketaz enplegu publikoaren eskaintzetan, alderdi politikoek arau berri bat adosteko “ardura” dutela adierazi du, eta "segurtasun juridikoaren" beharraz mintzatu da.
Pradalesek eta Sanchezek Irango gerra, Euskadi iparraldeko muga gisa hartzea eta medikuen greba aztertuko dituzte
Transferentziak eta Tubos Reunidosen zorraren berregituraketa izango dira landuko dituzten beste gai batzuk. Espainiako Gobernuak eta Eusko Jaurlaritzak aldebiko batzordearen laugarren bilera egingo dute ostiralean Moncloan.