Mendia: "Inork ez ditzala euskal herritarrak aukeratutako herrikoak sentiarazi"

Igande honetan, apirilak 12, ospatuko den Aberri Egunari begira, "inork ez ditzala euskal herritarrak aukeratutako herrian bizi direla sentiarazi nahi" eskatu du Idoia Mendia PSE-EEko idazkari nagusiak, izan ere, "gaitzetatik libre" geratzeko "jainkotiar hatz batek" ez dituela ukitu agerian geratu dela esan du, koronabirusaren agerraldiak eragindako ondorioei aipamen eginez. "Topagune, aniztasun eta bizikidetza guneak bultzatzen jarraituko ditugu sozialistok", ziurtatu du.

Hala, Aste Santu honetan, "fedearekiko edo aberriarekiko konfiantza" alde batera utzita, PSE-EEko buruak esan du bere alderdiak "erabateko konfiantza" duela "osasun publikoko profesionalengan", izan ere, "esparru publikoa" da, eta bertan denek dute tokia, bazterketarik gabe, "aldarrikatzen duten bandera bata edo bestea izan".

PSE-EEko idazkari nagusiaren esanetan, "arrazoi komun batengatik egiten den ahalegin kolektiboak emozio ugari sorrarazten ditu arratsaldero milaka balkoi eta leihotan, identifikatu beharrik gabe, banderen beharrik gabe. Hori da emaitzak ematen hasi den ahalegina, eta horretan jarraitu beharko dugu, birusari irabazten ari garen lehen borroka honetan atzerapausorik ez emateko".

"Ildo horretatik, edozein erlijiok, edozein banderak, izan ikurrinak edo Espainiakoak, ezin du ezer egin sistema publiko indartsu bat gabe, inor atzean gera ez dadin babes neurririk gabe, enpresen, langileen eta gobernuen artean partekatutako bultzada berririk gabe", azpimarratu du Mendiak. "Eta, guztiok partekatzen dugun bultzada horren baitan, bakoitza nahi duen moduan sentituko da, lehen bezala", gaineratu du.

"Espainiako zein Europako gainerako herriek izan dezaketen arrakasta bera izatearekin lotuta dago gure etorkizuna, gertukoena, euskal herritarrena. Gure enpresek haien produktuak saltzen baitituzte, eta horren mende dago langileen oparotasuna", nabarmendu du Mendiak.

Halaber, "elkarren beharra dugula ulertzen dugun garai bati hasiera ematea" eskatu du PSE-EEko idazkari nagusiak. "Askeak, berdinak, solidarioak eta erantzunkideak izan behar gara", gaineratu du. "Espazio komun horretatik kanpo, emozioak goraipatzea da politikan kontrako emozioak bultzatzen dituztenak ongien sentiarazten dituena, ahuleziez baliatzen direnak gizarte plural eta demokratiko baten oinarriak erasotzeko", ziurtatu du.

"Abertzaleak ez direnak seinalatu" nahi izatea leporatu dio Iturgaizek EAJri

Bestalde, EAJk Aberri Egunean ikurrinak jartzeko egin duen deialdiarekin "nazionalistak ez direnak seinalatu" nahi dituela salatu du Carlos Iturgaiz PP+Cs koalizioko lehendakarigaiak, eta, ildo horretatik, koronabirusaren agerraldia "bazterketan oinarritutako politika egiteko erabiltzea" leporatu die jeltzaleei.

"EAJren ustezko aberria da nazionalistei erosotasuna ematen diena eta deserosotasuna nazionalistak ez direnei", ziurtatu du EAEko PPko buruak. Hala, "euskal herritarren arteko zatiketa bultzatzen jarraitzea" leporatu dio alderdi jeltzaleari, eta, gaineratu duenez, "oraingo honetan ez du aukerarik galtzen, badakigu Aberri Eguna dela, hain zuzen ere, zatiketa hori areagotzeko modua”.

PPko ordezkariaren ustez, "Euskadin biztanle bakoitzeko osasun-langileen infekzio-tasa altuena izanik, lekuz kanpo eta, oro har, errealitatetik kanpo dago batzuek beren aberria euskal herritar guztiek dituzten kezka nagusiaren aurretik jarri nahi izatea".

 “Pedro Sanchez jeltzaleen hautagaia krisi honen aurrean egiten ari den kudeaketa negargarrian duen ardura ezkutatzen saiatzen ari da EAJ parafernalia honekin guztiarekin. EAJk babesa eman zion, EAJk botoa eman zion, eta EAJ bere gertaeren erantzule ere bada ", azpimarratu du.