Traperoren epaiketa, epaiaren zain

Josep Lluis Trapero Esquadra Mossoen maioraren aurkako epaiketa asteazken honetan amaitu egin da. Azken bi egunotan, Traperoren abokatuak sedizio-delituaren aurkako absoluzio-alegatua egin du; izan ere, fiskalak hamar urteko kartzela-zigorra eskatu du, sedizioagatik. Baliteke zigorra desobedientziagatik izatea, eta, hala balitz, Mossoen maiora ez litzateke espetxean sartuko.

"Epaiaren zain", esan du Concepcion Espejel auzitegiko presidenteak; lehenago, lau akusatuek, Traperok tartean, azken hitzaren eskubidea baztertu dute: "Ez, andrea. Eskerrik asko", esan du maiorak, eta horiek izan dira haren azken hitzak.

Horrela amaitu da epaiketa, hogeita hamar bat saio eginda. Koronabirusaren pandemiak eten egin zuen; une hartan, fiskalak akusazioa aldatzeko asmoa zuen, matxinadagatik egindako akusazioa, hain zuzen ere.

Epaiketaren azken txanpan jakin du Traperok zein den zigor-eskaera zehatza: kartzelako hamar urte sedizioagatik, ala, sediziorik ezean, 60.000 euroko isuna eta urte bat eta zortzi hilabeteko gaitasungabetzea desobedientziagatik. Hori bera eskatu dute Pere Soler Mossoen zuzendari ohiarentzat eta Barne Kontseilaritzako idazkari nagusi ohi Cesar Puigentzat.

Olga Tubau Traperoren abokatua bederatzi orduz izan da sedizio-delituaren aurka borrokatzen. Tubau, halaber, Teresa Laplana Mossoen intendentearen abokatua da; Laplanarentzat lau urteko espetxe-zigorra eskatu dute, sedizioagatik ere, baina desobedientziaren aukera ere egon badago.

Hori gorabehera, Miguel Angel Carballo Auzitegiko fiskalordeak argi utzi zuen, astelehenean, "oinarrizko" akusazioa sedizioa dela.

Harreman txarra, Traperoren eta Perez de los Cobosen artean

Hala ere, abokatuak ezeztatu egin du bi delituetako bat ere justifikatzen duen frogarik egotea. Esan duenez, Mossoek argi utzi zuten, urriaren 1eko erreferenduma egin aurretik, agindu judizialak beteko zituztela, eta hala egin zuten, nahiz eta desadostasuna zegoen, Diego Perez de los Cobos Guardia Zibileko koronela urriaren 1eko koordinatzailea izendatu zutelako. Traperok "harreman oso txarra" zuen Perez de los Cobosekin, eta abokatuak ez du hori ukatu; argi utzi du, halaber, ez duela uste koronelak esan zuena, ez zuela Traperorekiko ezinikusirik, posible denik: "Hori sinesgaitza da", esan du.

Hori bai, ezeztatu du fiskalaren tesia, alegia, maiora sedizioko delituaren "eremu zuzenean" ibili zela, jada Gorenak zigortutako proceseko liderrekin batera. Abokatuaren iritziz, Traperok erakutsi zuen agindu judizialak eta fiskalaren aginduak bete zituela, "erabat", erreferenduma galarazteko.

"Kataluniako norbaitek pentsatu bazuen Mossoek erreferenduma eta procesa babestuko zutela, nahiak errealitateekin nahasten ari zen", ziurtatu du abokatuak. Asteartean onartu egin zuen urriaren 1a porrot "politikoa eta poliziala" izan zela, baina hiru Poliziena: Mossoena, Polizia Nazionalarena, eta Guardia Zibilarena.

Perez de los Cobos koronelak onartzen badu Mossoen plana ezagutzen zuela, alegia, bozketa-zentroetan agenteen bikoteak izango zirela, horrek esan nahiko luke hiru Poliziek huts egin zutela, ez bakarrik Mossoek; hala adierazi du Olga Tubau abokatuak.

Fiskalaren arabera, aldiz, Mossoen 2017ko irailaren 20ko eta urriaren 1eko jokabidea "orden publikoaren utziera kontzientea" izan zela. Jokabide horrek "baimendu egin zuen egoera ezinezko bilakatzea, eta indarkeriaren esku geratu zen. Jendetza zegoen kalean, eta jendetza horrek epaileak agindutakoa ez betetzea zuen helburu".