Agerraldiak larriagotzen badira, alarma berriz ezar daitekeela esan du Calvok

Carmen Calvo Espainiako Gobernuko presidenteordearen esanetan, Exekutiboa aztertzen ari da "alarma-egoera ezartzea lurraldearen zati batean, osoan ez bada", koronabirusaren agerraldiak larriagotzen badira.

"Nahiago nuke egin behar ez izatea, baina irmoak izango gara osasuna babesteko. Unea iritsiz gero, Gobernua erantzukizunez arituko da berriro", esan du Calvok.

Hala eta guztiz ere, presidenteordeak azaldu duenez, une honetan Espainiako 12 foku aktiboak "kontrolpean" daude, eta egoera "aurreikusitakoaren barruan" dago; beraz, ez da beharrezkoa izango alarma-egoera ezartzea.

"Agerraldiak izango direla esan behar dut. Garrantzitsuena da ahalik eta azkarren kontrolatzea, eta sintomak dituzten guztiek oso azkar erantzutea osasun-zentroetara joanda. Azkartasuna da garrantzitsuena", zehaztu du Calvok.

Ildo horretan, presidenteordeak berretsi du Espainiako Gobernuak arduraz eta irmo jokatu zuela MOEk pandemiaren berri eman zuenean. "Neurri zorrotzena hartu genuen, konfinamendua, eta hala zela esan genuen ez zegoelako beste modurik", gaineratu du.

Gobernuak norbanakoen erantzukizuna aipatu du

Oraingoz, herritar guztiek "beren kuotarekin" lagundu ahal izatea da Exekutiboak "planteatzen" duena, igandean, indarrean sartu eta hiru hilabete baino gehiago igaro ondoren, bertan behera geratu zen mekanismo konstituzional hori berriro ezarri beharrik ez izateko.

Astelehen honetan Osasun Ministerioak 11 foku aktibo daudela esan ondoren egin ditu adierazpen horiek Espainiako presidenteordeak, eta maiatzaren 11n kasuak zaintzeko sistema berria martxan hasi zenetik 36 detektatu dituztela gaineratu du.

Fernando Simon Osasun Alertak eta Larrialdiak Koordinatzeko Zentroko zuzendariak astelehenean azaldu duenez, Espainian izurritea "beheranzko joera leuna" erakusten ari da, aurreko asteetan ikusitakoaren ildotik. "Duela aste edo hilabete batzuk baino askoz gehiago detektatzen ari gara, eta horrek egoera hobean jartzen gaitu agerraldien aurrean erantzun ahal izateko", esan du.

Gobernuak ez duela beste alarma egoerarik aurreikusten argitu du Monterok

Bestalde, Maria Jesus Montero Ogasun ministro eta Gobernuko bozeramaileak azaldu duenez, Espainiako Gobernuak ez du aurreikusi eta ez du aztertzen beste alarma egoera bat ezartzea, koronabirusaren pandemiaren egoera goitik behera aldatu ezean.

Halaber, birusa berragertuz gero, ez du uste herritarren mugikortasuna murrizteko legeria arrunta aldatu ahal izango denik, alarma egoerak ematen dituen berme berberekin; izan ere, Diputatuen Kongresuaren baimena behar da, Konstituzioan aurreikusitako hasierako 15 egunak baino gehiago luzatu ahal izateko.

Lasaitasun mezua helarazteko asmoz, Espainiako Gobernuko bozeramaileak argi utzi du ez direla aztertzen ari "ez epe laburrean, ezta epe ertainean ere alarma egoera berriro ezartzea", pandemia kontrolpean dagoelako, kutsatzeek aurreikusitako eboluzioa jarraitzen dutelako eta agerraldiak "noizbehinkakoak" direlako gune jakin batzuetan, eta "kontrolatzeko behar diren tresnak daudelako".

Azpimarratu duenez, osasun egoera orokorra goitik behera aldatu ezean, Espainiako Gobernuak ez du "buruan" beste alarma egoera bat onartzea. Hala ere, azaldu du hori gertatuko balitz Gobernuak "eskura dituen mekanismo guztiak" erabiliko lituzkeela birusa kontrolatzeko.