Sarek "guztion artean bidea" egiteko gonbita bota du, espetxe politikan "aurrerapausoak" emateko

Sare herritarra plataformak ekitaldia egin du larunbat goizean Bilboko Euskalduna Jauregiaren parean, arratsaldean izatekoa den manifestazioaren aurretik. Euskal presoen eskubideen aldeko elkarteak deitu du gaurko mobilizazioa, Bizkaiko hiriburuan, espetxe politikan "aurrerapausoak" emateko helburuz. Arratsaldeko 17:00etan abiatuko da La Casillatik, ibilbidea Zabalburun amaitzeko.

Anaiz Funosasek eta Joseba Azkarragak hartu dute hitza, eta ordezkatzen dituzten Bake Bidea zein Sare plataformen izenean eskerrak ematen hasi dira, "gaur hemen gurekin zaudeten guztioi" eta baita "hemen egoteko aukerarik izan ez arren, gure herriak hainbeste behar duen elkarbizitza lortzeko laguntza eman diguzuen guztioi ere".

Gogora ekarri dutenez, duela urtebete, leku horretan bertan eta "itxaropena oinarritzat hartuta, esan genuen 2022a urruntze eta sakabanaketa politikaren amaieraren urtea izango zela, eta hala da; etapa hori ia gaindituta dago".

Era berean, nabarmendu dute bidean "sufrimendu handia" izan dela, jatorri ezberdineko indarkeriekin batera, eta "utopia" aipatu dute etorkizuneko amets gisa, bizikidetza eraikitzeko prozesuan.

Aipatu etapa itxi eta beste bat abiarazi dutela azaldu dute Funosasek eta Azkarragak, "espetxe politika arruntaren aplikazioa azkartzearena", alegia. "Eta orain arte egin dugun bezala egingo dugu", erantsi dute, "aldarrikapena kalera eramanda, gaur arratsaldean egingo dugun bezala".

Sarek eta Bake Bideak akordio bat lortzeko eta biktima orok aitortza izan dezan "lanean jarraituko" dutela azpimarratu dute, "enpatia" oinarri hartuta.

"ETA oraindik ere existitzen dela zabaldu nahi duten zoritxar iragarleei gogorarazi behar diegu orain dela 12 urte hartu zuela behin betiko su etena ezartzeko erabakia", adierazi dute, "erakundea desegin arte".

Hala, Sarek duela egun batzuk argitaratutako txostena hizpide hartuta, iragarri dute "Auzitegi Nazionaleko fiskaltzaren blokeo jarrera eta EAEko espetxe administrazioaren erabakien aurka etengabe aurkezten dituen helegiteak" izango direla euren lanaren ardatzak hemendik aurrera.

Era berean, esan dute espetxe politika arrunta aplikatuta, "110 euskal preso erdi askatasunean edo baldintzapeko askatasunean" egongo liratekeela gaur egun. Indarrak datuotara bideratuko dituztela gaineratu eta "guztion artean bidea" egiteko gonbitarekin amaitu dute.

Biktimek erabiliak ez izateko eskatu dute

Bestalde, ETAren eta torturen biktimek bat egin dute alderdi politiko batzuek erabili egin dituztela eta horrek "berriro biktimatzea" eragiten diela adierazterakoan. Azpimarratu dute "desberdin" pentsatzen dutela, baina "minak batzen" dituela.

Sarek Euskaldunan antolatu duen mahai-inguruan Rosa Lluch Ernest Lluchen alabak azaldu duenez, "nazkagarria" da "eskuin muturreko alderdiek oraindik ETA existitzen dela esaten aritzea".

"Biktimak zatitzen tematzen den jendea egotea" deitoratu du. "Pairatu dugun indarkeriak homogeneizatu egiten gaitu, baina horrek ez du esan nahi berdin pentsatu behar dugunik", gaineratu du, "pertsonak bahitzen edo hiltzen zituztenean, edo legea betearazi beharko luketen eraikinetan torturatzen zela jakinda ere isilik" egon zirenen jarrera salatu aurretik.

Rosa Roderok, Joseba Goikoetxearen alargunak, uste du ez dela onargarria ETA existitzen ez denean "preso dauden pertsonen eskubideak urratzen jarraitzea"; eta gogorarazi du bere senarra kartzelatu eta torturatu egin zutela Frankismoan.

Roderok uste du ezin dela indarkeria sekula justifikatu eta ezin dela "gorrotoan bizi". Horregatik parte hartu omen du "edonolako giza eskubideen urraketen biktimekin" antolatutako foroetan, Mari Nieves Diaz Iratxe Sorzabal torturen biktimaren amak bezalaxe.

Diazek azaldu duenez, deiak jaso zituen alaba atxilotzen zutenean "torturatu eta bortxatu" egingo zutela ohartaraziz, eta erabat jota azaldu du "ama gisa" jaso zuen mina alaba "ezin babestuta".

Tamara Muruetagoienak, Esteban Muruetagoienaren alabak, "egia" jakiteko eskubidea aldarrikatu du, oraindik ez baitute argitu bere aitarekin zer gertatu zen: "Justizia eta konponketa poliziaren indarkeriaren gainerako biktimek bezalaxe".

Irantzu Benitok ere parte hartu du mahai-inguruan. ETAko preso bat bisitatzera zihoazela istripua izan zuten eta senarra hil zitzaion.