Veneziako Batzordeak Amnistia Legea babestu du, baina kritikatu egin du premiaz izapidetu izana

Veneziako Batzordeak Amnistia Legea babestu du ostiral honetan zabaldutako irizpenean, atzo lege testuak Espainiako Diputatuen Kongresuan lehen pausoa eman eta biharamunean. Orain, Senatura igorriko dute, eta Kongresura itzuliko da gero.

Zuzenbide Konstituzionalean adituek osatzen dute Veneziako Batzordea. Horren irizpenak, baina, ez dira lotesleak.

Babesa eman aurretik, besteak beste, Miguel Rollan (PP) Senatuko presidentearen eta Isaura Leal (PSOE) Kongresuko bigarren idazkariaren iritziak entzun dituzte.

Batzordeko kideek, hala ere, legearen oinarriak babestu dituzte, baina ezbaian jarri dute premiaz tramitatu izana, eta gehiengo zabalagoarekin onartzeko gomendatu.

Hauek dira Veneziako Batzordearen bi gomendio nagusiak:

- Denbora-muga: Legearen azken aldaketaren ondoren (2011ko azaroaren 1ean gertatutakoei eragiten dien epea luzatzen du), Batzordeak uste du denbora-esparrua gehiago mugatu behar dela.

- Gehiengo kualifikatua onartzeko: Batzordeak agintariei gomendatu die Diputatuen Kongresuan lortutakoa baino gehiengo zabalagoa erdiesten saiatzeko, Konstituzioan lege organiko bat onartzeko eskatzen dena.

Txostenak Amnistia Legea babesten al du?

Txostengileek adierazi dute hori ez zela euren egitekoa. Batzordeak esan dutenez, ez du eztabaidarik egin lege honen komenigarritasunari buruz, hori "erabaki politikoa" baita, eta ez die eragiten. Baina, amnistia, oro har, adiskidetze sozial, politiko eta instituzionalerako helburu legitimoa dela esan du.

Bere konstituzionaltasunari buruzko iritzirik ematen al du?

Ez, ezta Europako araudiarekin bat datorren ere. Horien esanetan, Espainiako Auzitegi Konstituzionalari eta Europako auzitegiei dagokie erabaki hori hartzea.

Hala ere, Veneziako Batzordeak azken txostenean iradoki du, garaia iritsitakoan, amnistia esplizituki arautzea Konstituzioaren erreforma baten bidez, gaiak eztabaida bizia sortu baitu.

Botere-banaketa

Bestalde, Batzordeak ez du inolako arazorik ikusten botere-banaketarekin, amnistiaren onura indibidualei buruzko erabakia epaile batek hartzen duen bitartean, amnistiari buruzko lege-proiektuan jasotako irizpideetan oinarrituta, eta atxiloketa, espetxealdia eta behin-behineko neurriak kentzea erabaki judizial horren ondorio denean.

Epaileak, ikerketa-batzordeetan

Amnistiarekin zerikusirik ez izan arren, epaileak ikerketa-batzordeetara deitzeari buruzko iritzia eman du Batzordeak. Horren ustez, ikerketa-batzordeak beharrezkoak dira Gobernuaren ekintzak gainbegiratzeko, baina epaileek ez lukete erantzun beharrik izan behar.

Felix Bolaños Presidentetza, Justizia eta Gorteekiko Harremanetarako ministroak Amnistia Legearen "adostasunarekin bat egiteko" eta "bere ontasunak aitortzeko" eskatu dio PPri, Batzordeak arauari "erabateko babesa" eman ostean. Bolañosek Alderdi Popularraren "gezurrak, desitxuratzeak eta faltsukeriak" gaitzetsi ditu.

Aitzitik, PPren iritzian, Batzordearen txostenak "ez du Amnistia Legea babesten", eta Espainiako Gobernuak "beste kolpe bat jaso du" txosten horrekin, "PSOEren gezurrak agerian utziz". "Veneziako Batzordeak koloreak atera dizkio Sanchezi", adierazi dute PPko iturriek.

Isaura Leal (PSOE) Espainiako Diputatuen Kongresuko bigarren idazkariaren ustez, ordea, Batzordearen azken txostenak erakusten du araua "konstituzionala" dela, Europako zuzenbidearekin bat datorrela eta "berme guztiekin ezarritako prozeduren arabera" izapidetu dela.