Eusko Legebiltzarrak atzera bota ditu PPk, Sumarrek eta Voxek aurrekontuei aurkeztutako osoko zuzenketak
Eusko Legebiltzarrak atzera bota ditu PPk, Sumarrek eta Voxek Eusko Jaurlaritzaren 2025eko aurrekontuen proiektuari aurkeztutako osoko zuzenketak. EAJren eta PSE-EEren 39 legebiltzarkideek kontra bozkatu dute eta EH Bilduren 27ak abstenitu egin dira. Zuzenketak aurkeztu dituzten taldeen bederatzi ordezkariek bakarrik eman dute aldeko boza.
Hala, gaurko osoko saioan osoko zuzenketak eztabaidatuta, hurrengo urratsa erdibideko zuzenketak aztertzea izango da. Datorren ostegunean izango da hori, eta hilaren 20an egingo da behin betiko bozketa.
Bien bitartean, Jaurlaritzaren eta EH Bilduren artean aurrekontuen negoziazioa zabalik dago, eta ikusteko dago zein izango den emaitza. Nolanahi ere, kontuak aurrera ateratzea bermatuta du Gasteizko Gobernuak, jeltzaleek eta sozialistek gehiengoa baitute Legebiltzarrean.
Gaurko saioan hitza hartzen aurrena Noël D'Anjou Ogasun eta Finantza sailburua izan da. Aurrekontu egitasmoaren defentsa egin du, "erantzukizunean, zorroztasunean eta bideragarritasunean oinarrituta" dagoela esanez. Bere hitzetan, "aurrekontu hauek gure herriaren etorkizunean jartzen dute arreta, eta etorkizun hori, zalantzarik gabe, orain hartzen ditugun erabakiek baldintzatuko dute".
EH Bildurekin negoziazioa "zabalik" dagoela gogoratu du sailburuak, eta koalizioak "jarrera maximalistak" alboratu eta Jaurlaritzaren proiektura "gerturatu" izana txalotu du. Nolanahi ere, erantsi du ez dituela "ulertzen" talde horrek azken asteotan aurrekontuen negoziazioen harira egindako adierazpenak. "Seriotasun eta koherentzia eza" leporatu zion EH Bilduk Jaurlaritzari.
Bere aldetik, Pello Otxandiano EH Bilduren eledunak Eusko Legebiltzarrean berretsi du "borondate osoa" dutela akordioa erdiesteko, eta beste behin, nabarmendu du etxebizitzaren gaia eta lanbide arteko gutxieneko soldata propioarena direla euren ardatzetako bi.
Eztabaida
PPren osoko zuzenketaren defentsa Javier De Andres legebiltzarkideak egin du. Esan du ez dutela Jaurlaritzaren proiektua babestuko, ez direlako "fio". "Hezkuntza inoizko okerren dago, segurtasun eza goraka doa, etxebizitza garestiagoa da eta emantzipatzea geroz eta zailagoa", erantsi du.
Jon Hernandez Sumarren ordezkariak, berriz, azaldu du ez datozela bat Jaurlaritzaren ildo nagusiekin. Bere hitzetan, "herritarren beharretatik urrun" dago aurrekontuen proiektua.
Azkenik, Voxeko Amaia Martinezek adierazi du "Urkulluk utzitako legatuaren kalkoa" direla "Pradalesen aroko lehen kontuak". "Historiara pasatuko dira, inoiz baino entxufatu gehien soldatapean izateagatik".
763 erdibideko zuzenketa
Orotara, 763 erdibideko zuzenketa aurkeztu dituzte taldeek, eta horiek ostegunean eztabaidatuko eta bozkatuko dituzte, Legebiltzarraren Ogasun batzordean. Baliteke egun horretan bertan jakitea Jaurlaritzaren eta EH Bilduren artean akordioa dagoen edo ez.
EH Bilduk 25 erdibideko zuzenketa aurkeztu ditu; PPk, 634; Sumarrek 62; EAJk eta PSE-EEk, 39; eta EH Bilduk, PSE-EEk eta Sumarrek elkarrekin 3 aurkeztu dituzte.
Albiste gehiago politika
Eneko Andueza konbentzituta dago 'Koldo auziak' ez duela PSE-EEn eraginik izango
PSOE eta Nafarroak Alderdi Sozialista astintzen ari den ustezko ustelkeria kasuaren aurrean, Eneko Andueza PSE-EEko idazkari nagusia konbentzituta dago ez duela eraginik izango Euskadiko Alderdi Sozialistan. Halaber, sozialistak kritikatzen ari direnei zuhur jokatzeko gomendioa egin die. Izan ere, horren esanetan, orain fokoa sozialisten gainean badago ere, litekeena da auzia beste alderdi batzuengana ere zabaltzea.
Semper: "EAJ jabetzen hasi da PSOEk halako batean botata utzi egingo duela"
PPren bozeramailearen arabera, "Euskadin etorkizunerako aukera aritmetikoa PSE Bildurekin joatea da, EAJ albo batera utzita".
Lehendakariak baztertu egin du 'Cerdan auzia'k EAJ/PSE-EE gobernuari kalte egingo dionik: "Egonkortasuna zaintzea garrantzitsua da"
"Zorionez, Euskadin bestelako giro politikoa dugu. Ez gaude madrildarren lokaztian", adierazi du lehendakariak 'Cerdan auzia'k Euskadin izan ditzakeen ondorioez galdetuta.
"Sanchezek irmoago, gardenago eta azkarrago jardun behar du"
Lehendakariaren ustez, Espainiako Gobernua "beste fase batean sartu da", azken egunetan ezagutu diren ustezko ustelkeria kasuen ostean. "Egoera oso larria da, eta zapaldu ezin daitekeen ildo etiko bat dago jokoan", gaineratu du Pradalesek.
Imanol Pradales: 'Akordio batzuk zabalagoak izatea gustatuko litzaidake'
Lehendakari izan den lehen urtean zer ez den ondo egin galdetu diotenean, Imanol Pradalesek esan du gustatuko litzaiokeela "akordio batzuk zabalagoak izatea, batez ere aurrekontuen arloan". Gainera, lehendakariak kritikatu du zenbait unetan gobernukideek desadostasun puntuak jendaurrera eramatea. "Aldez aurretik sukaldeko lana eginda saihestu genitzakeen", gaineratu du.
Alzorrizek dimisioa eman du PSNko idazkariorde nagusi gisa, bere bikotekideak Servinabarren lan egin zuela onartu ondoren
Alzorrizek ere dimisioa eman du Nafarroako Parlamentuko PSNren bozeramaile gisa, baina parlamentari bezala jarraituko du. Prentsaurrekoan jakinarazi duenez, bere bikotekideak Belateko tuneletako eraikuntzan parte hartu zuen Servinabar enpresan lan egin du. UCOk adierazi du Cerdan enpresa horren % 45en jabe zela.
Berdintasun ministroak prostituzioa debekatzeko lege proposamena eramango du irailean Ministroen Kontseilura
Ana Redondo ministroaren esanetan, "Espainiako gizartea eraldatuko duen legea izango da", eta "prostituzioa eta matxismoa desagerrarazteko bide horretan" lagunduko du.
EAJk eta EH Bilduk ustelkeriaren aurka irmotasun handiagoz jardutea eta itunak betetzea eskatu diote Sanchezi
Bi euskal alderdiak Espainiako Gobernuko presidentearekin bildu dira asteazken honetan, Moncloan, 'Cerdan auzia'k irekitako krisiaren harira. Biek ala biek erregenerazio demokratikoa eta erantzukizuna eskatu diote Sanchezi, baina ñabardura ezberdinak izan dituzte, tonuari eta eskakizunei dagokienez.
Chivitek dio ez duela Cerdanen eta Servinabarren loturaren berririk eta PSNren kontuen auditoria iragarri du
Horrez gainera, “politikari eta pertsona gisa traizionatua” sentitzen dela esan du Nafarroako Gobernuko presidenteak.