Kongresuak atzera bota du omnibus dekretua, eta pentsioen igoera eta garraiorako laguntzak koloka jarri ditu

Diputatuen Kongresuak atzera bota du pentsioen igoera eta garraio publikorako laguntzak barne hartzen dituen omnibus dekretua, Junts, PP eta Voxen aurkako botoekin, eta, hortaz, oraingoz neurri horiek ez dira indarrean sartuko.

Energia konpainiei ezarritako zerga berezia luzatzeko dekretua ere bertan behera gelditu da. Hala ere, Espainiako Gobernuak aurrera atera du erretiroari buruzko dekretua, PPren babesarekin.

Bozketa egin aurretik PPk eta Juntsek iragarri dute Espainiako Gobernuak gaur Kongresura eraman duen omnibus dekretuaren aurka bozkatuko zutela, eta erabaki horrek pentsioen igoera eta garraiorako laguntzak koloka jarri ditu.

Miriam Nogueras Juntsek Kongresuan duen bozeramaileak aurreratu du bere taldeak hiru dekretuen aurka bozkatuko duela. Horren esanetan, "lotsagarria" da pentsioen igoera beste neurri batzuekin nahastu eta dekretu batean jasotzea. Dena den, pentsioen igoera eta garraio publikorako hobariak onartzearen alde agertu da, eta, adierazi du bi neurri horiek beste errege dekretu batean jasoz gero, Juntsek alde bozkatuko lukeela.

"Gaur gertatuko dena PSOEren arduragabekeriaren eta seriotasun faltaren ondorio da", esan du Noguerasek. Halaber, hitz gogorrak bota dizkio PSOEri eta "gezurrak esatea, manipulatzea, nagusikeria eta akordioak ez betetzea" leporatu die sozialistei.

PPk ere bozketaren aurretik argitu du zer bozkatuko zuen. Omnibus dekretuaren kontra bozkatu behar zuela aurreratu badu ere, iragarri du pentsioen igoera bermatzeko lege proposamena bultzatuko duela. Popularren iritziz, ez da egokia pentsioen igoera beste neurri batzuekin dekretu berean nahastea. Are gehiago, pentsioak eguneratu ahal izateko aparteko dekretu bat onartzea proposatu du, "borroka politikoak" albo batera utzita.

Koalizio gobernuaren beste hainbat neurri berreskuratzeko asmoa agertu dute popularrek, goi-geruzetako depresioak kaltetutakoei buruzkoa eta bizitzeko gutxieneko diru-sarrerari buruzkoa, besteak beste.

Espainiako Gobernuak hiru dekretu eraman ditu Kongresura, diputatuen oniritzia lortzeko asmoz.

Azkenean, ordea, hiru dekretuetatik bakarra lortu du onartzea, pentsioen erreformari eta erretiroari buruzkoa.