EH Bilduk Industria Politikaren Diseinurako Kontseilua sortzea proposatu du, politika proaktiboak sustatzeko

Industria Politikaren Diseinurako Herri Kontseilua sortzeko proposamena erregistratu du gaur EH Bilduk Eusko Legebiltzarrean. "Ehun industriala indartzea" eta "egungo erronkei aurre egiteko estrategia diseinatzea" izango lirateke bere funtzio nagusiak, horretarako "politika proaktiboa eta etorkizunera begirakoa" ardatz hartuta.

Pello Otxandiano EH Bilduk Gasteizko Ganberan duen eledunak eta Ander Goikoetxea legebiltzarkideak aletu dute proposamena, hedabideen aurrean egindako agerraldian. Azpimarratu dutenez, euskal industriaren egoera "gero eta kezkagarriagoa da hainbat sektoretan" —Guardian eta Talgo aipatu dituzte adibide gisa— eta ezinbestekoa da Eusko Jaurlaritzak "rol proaktiboa" hartzea. "Jaurlaritza ezin da jarrera erreaktibo batera mugatu", ohartarazi du Otxandianok.

Zentzu horretan, koalizioak uste du Imanol Pradales lehendakariak joan den astean iragarritako Euskal Industriaren Ekintza eta Defentsarako Taldeak ez diela aurrea hartuko industriaren alorrean sortzen ari diren arazoei. Horren aurrean, EH Bilduk azaldu du "anbizio handiko industria politika baten aldeko apustua" egin nahi duela, "sektorearen indarguneak aprobetxatu, ahuleziei aurre egin eta Euskadi merkatu globalean posizio lehiakor batean kokatzeko".

EAEko "eragile ekonomiko eta industrial nagusiak bilduko dituen organo egonkor bat sortzea du xede" gaur aurkeztutako planak. Azaldu dutenez, Kontseilu horretan hainbat enpresa eta elkartek izango lukete ordezkaritza: sindikatuak, kooperatibak, unibertsitateak eta eskualdeetako garapen agentziak, besteak beste. Denen parte-hartzearekin industria sektorea suspertzeko "estrategia eraginkor bat diseinatzea" nahiko luke EH Bilduk, begirada "epe luzean" jarrita, baina "proposamen zehatzekin".

Ander Goikoetxea legebiltzarkideak azaldu duenez, "industria politikari lotutako eragile nagusiek osatuko lukete Kontseilua, aditu talde txiki baten aholkularitzak lagunduta". "Horren helburua 10 urterako industria estrategia garatzea eta urtero batzar espezifikoetan berrikustea izango litzateke", zehaztu du.

"Jaurlaritzarentzat eta Legebiltzarrarentzat proposamenak eta txostenak sortzeaz gain", Kontseiluak egunerokoan aplikagarriak diren neurri zehatzetan ere lan egitea proposatzen du EH Bilduk. "Ezin dugu inprobisazioz funtzionatzen jarraitu gure industriaren bideragarritasuna jokoan dagoenean". 

Zerrenda bateratuak

Bestalde, galde-erantzunen txandan, joan den asteburuan EH Bilduk proposatutako zerrenda bateratuen proposamena berretsi du Otxandianok, herri mailako interesak alderdien interesen gainetik egon behar dutela sinetsita.

Ezker abertzaleko koalizioak joan den asteburuan Iruñean egin zuen kongresuan jarri zuen proposamena mahai gainean: Senaturako, Kongresurako eta Europako Parlamenturako hauteskundeetarako beste alderdi batzuekin —EAJrekin eta ezker konfederalarekin— zerrenda bateratuak osatzea onartu zuten, "adostasun zabaleko gutxieneko programa komun bat oinarri hartuta". Berehala baztertu dute proposamena jeltzaleek, Sumarrek eta Podemos-Ahal Duguk, ez dela bideragarria iritzita.

Otxandianoren arabera, proposamena "egokia" da eta "dudarik gabe" bere horretan utziko dute aipatutako hauteskunde hitzorduetan. Uste du egungo egoera politikoan are beharrezkoagoak direla halako erabakiak. "Herri ikuspegia duen epe luzeko proposamena da", erantsi du.

Hori horrela, EH Bilduren ordezkariaren hitzetan, "gutxieneko programa adosteko gai" izan beharko lukete alderdiek, eta herriaren interesak lehenetsi.