Lehendakaria, New Yorkeko Euskal Etxean: "Estatu Batuetan gure antenak izatea nahi dugu"

Imanol Pradales lehendakariak New Yorkeko euskal komunitateari eskatu dio Euskal Autonomia Erkidegoaren eta Estatu Batuen artean lotura egonkor eta iraunkorrak sortzeko lanean jarrai dezala. "Estatu Batuetan zuek gure antenak izatea nahi dugu, eta bidean sortzen diren aukerak guri identifikatzen laguntzea. Herrialdearen errealitateari pultsua hartzen laguntzea. Lotura egonkor eta iraunkorrak sortzen jarrai dezazuen nahi dugu, Euskal Autonomia Erkidegoak Atlantikoaren beste aldean ere baduen papera indartzeko eta, horrela, hobeto konektatuta egoteko", adierazi du.

New Yorkeko Euskal Etxean (Euzko Etxea) —euskal egoitzarik zaharrena kanpoan— egindako topaketan, Imanol Pradalesek Euskal Autonomia Erkidegoaren eta diasporaren arteko loturak indartzearen garrantzia azpimarratu du, "Euskadi Global" estrategiaren baitan. "Zubiak behar ditugu, ez harresiak", esan die.

Estatu Batuetara egin duen lehen bidaia instituzionalean, lehendakariak omenaldia egin nahi izan die New York etxe bihurtu zuen euskal herritarrei. Arlo horretan, Valentin Agirre eta Benita Orbe pertsona garrantzitsuak ekarri zituen gogora; izan ere, Agirrek eta Orbek laguntza eman zieten Ellis Islandera iritsi berriei eta Eusko Jaurlaritzari, hain zuzen ere, New York hiritik abian jarri zuen Jose Antonio Agirre lehendakariari.

Iragana gogoratzeaz gain, orainean eta etorkizunean jarri du arreta lehendakariak, eta diasporarekiko lotura kultural, sozial eta ekonomikoak bizirik mantentzeko beharra azpimarratu. "New Yorkek itxaropena eta aukerak sinbolizatzen ditu, hona iritsi ziren euskal herritarrek belaunaldiz belaunaldi egin duten bezala", adierazi du.

Brooklynen kokatutako Euzko Etxearen egoitzan bertan egin zen harrera-ekitaldian New Yorkeko euskal komunitatearen ordezkaritza handi bat bildu da. Ordezkaritza hori bigarren eta hirugarren belaunaldien ondorengoek, hirian sustraiak bota dituzten herritarrek eta hainbat esparrutan ibilbidea izan duten migratzaile berriek osatzen dute.

Bertan izan dira, halaber, Eusko Jaurlaritzaren lehenengo lehendakariorde eta Kultura eta Hizkuntza Politikako sailburu Ibone Bengoetxea; Zientzia, Unibertsitate eta Berrikuntzako sailburu Juan Ignacio Perez Iglesias; Bizkaiko eta Gipuzkoako diputatu nagusi Elixabete Etxanobe eta Eider Mendoza; eta Emakunderen zuzendari nagusi Miren Elgarresta. Era berean, kultura eta irakaskuntza arloko pertsona ospetsuak ere izan dira bertan, besteak beste, Juan Ignacio Vidarte, Miren Arzalluz eta Jon Azua.

New Yorkeko Euzko Etxea, 1913an sortua eta Brooklyngo Greenpoint auzoan kokatua, Estatu Batuetako euskal etxerik zaharrena da, eta mende luzez hiri horretan euskal kulturaren bilgune eta babesgune izan da.

Gaur egun, 40 bat euskal etxe daude Estatu Batuetan zehar, euskal komunitatearen presentzia handia duten eremuetan banatuta, hala nola Boisen (Idaho), Bakersfielden (Kalifornia) eta Renon (Nevada).