Euskadiko PPk adingabe migratzaileen inguruan egindako diskurtso "arrazista" kritikatu dute alderdiek

EAEko alderdi politikoek EAEko PPk etorkin adingabeei buruz egindako diskurtsoa kritikatu dute, "arrazista" dela iritzitza, eta popularrei "mezu xenofoboak ez zabaltzeko" eskatu diete.

EAJk, EH Bilduk, PSEk eta Sumarrek Javier de Andres EAEko PPko presidentearen hitzei erantzun diete. Horren esanetan "oso arrazista eta supremazista da pentsatzea adingabe atzerritarrak hobeto babestuta egongo direla Europan euren herrialdeetan euren familiekin baino" eta haur horiek aberriratzearen alde egin du.

Euskadi Irratian egindako elkarrizketa batean, Elixabete Etxanobe Bizkaiko ahaldun nagusiak "nahiko tamalgarritzat" jo ditu adierazpen horiek, eta PPri "koherentzia" eskatu dio, Batzar Nagusietan popularrek ez dutelako halako jarrerarik babesten, "alderantziz baizik".

"Euskadi beti izan da herri eskuzabala, irekia eta solidarioa, baina horrek ez du esan nahi banaketa justua eta gainerako autonomia-erkidegoen lana eta erantzukizuna eskatuko ez ditugunik", esan du Etxanobek, eta arduraz jokatzeko eta "mezu xenofoboak ez zabaltzeko" eskatu du, "haurrak direlako eta ez direlako estigmatizatu behar".

Diana Urrea EH Bilduko legebiltzarkideak "olatu ultra eta xenofoboari modu bateratuan aurre egiteko" deia egin du X sare sozialean, Migraziorako Euskal Itun Sozialean egin zen bezala.

"Eskuin muturrak, Javier de Andresen ahotan, adierazpen nazkagarriak egiten ditu, kalteberatasun- eta babesgabetasun-egoeran dauden adingabeak seinalatzen eta kriminalizatzen dituztenak.", gaineratu du.

Eneko Andueza PSE-EEko idazkari nagusiaren eta Alba Garcia Sumarreko idazkari nagusiaren iritziz, Euskadiko PPk etorkin adingabeei buruz egiten duen diskurtsoa "arrazista eta xenofoboa" da.

Eusko Legebiltzarrean bilera egin dute  biek, eta horren ostean, nork bere aldetik, Javier de Andresen mezua kritikatu dute.

Anduezak azpimarratu duenez, "beren herrialdeetan hain gustura baleude, ez nuke uste, etorkizun hobe bat lortze aldera, Itsasartea zeharkatu eta bizitza jokoan jarriko luketenik".

"Tamalgarriena da Euskadiko PPren diskurtso arrazista eta xenofoboetara ohitzen ari garela, Ayusoren diskurtsoa Euskadira ekartzeko ahaleginaren beste kapitulu bat da hau", azpimarratu du Anduezak.

PSE-EEko buruzagiaren ustez, PPren beraren kalterako da jarrera hori, "euskal politikan bere burua isolatzeko" pauso bat baita bere ustez. "Akatsa da Euskal Herriak beti erakutsi duen elkartasunari eraso egitea", gaineratu du. 

Bestalde, Alba Garciak "arrazistatzat" jo du PPk adingabeen inguruan duen jarrera. Bere hitzetan "lotsagarria" da "agintari politiko batek adierazpen arrazista eta xenofobo horiek egitea, bereziki haurrei buruz ari garenean".

"Euskadi harrera-herrialdea da eta izango da, eta Sumarren uste dugu giza eskubideak, eta zer esanik ez haurrenak, ez direla ukitzen", azpimarratu du Garciak.

Bere aldetik, diskurtso arrazista eta xenofoboen aurrean "irmo" jokatzeko eskatu du Podemosek, "oso arriskutsuak" direlako. "Gorroto-mezuak baliabide gehiagorekin borrokatzen dira, biztanleria migratzailearen bizitokia, gizartea eta integrazioa babesteko", esan du bere X kontuan.