Ubarretxenak, Anduezari: "Gobernu kontseiluan ez zen desadostasunik egon"

Eusko Jaurlaritza osatzen duten bi alderdien artean migrazioaren kontura sortutako eztabaidak zeresana ematen jarraitzen du. Maria Ubarretxena Eusko Jaurlaritzako bozeramaileak ukatu egin du astearteko gobernu kontseiluan gaiari buruzko desadostasunik egon zela, bezperan Eneko Andueza PSE-EEren idazkari nagusiak esandakoari erantzunez —Ubarretxenak esandakoa gezurtatu zuen eta gaiaz hitz egin zela eta bi sailburu sozialistak kontrako iritzia agertu zutela esan zuen—. Are gehiago, berretsi du migrazioari buruzko azalpenak egin eman zirela gobernu bileran eta inork ez zuela kontrakorik esan. 

ETB1eko "Egun on Euskadi" saioan egin dioten elkarrizketan, Ubarretxenak ez du polemikan sartu nahi izan, eta nabarmendu du eta herritarrek politikariei "ados jartzea eta ika-mikak albo batera uztea" eskatzen dietela.

Ildo horretan, Ubarretxenak azpimarratu du "zubiak eraikitzearen aldekoa" dela "zubiak eraistearen aldekoa baino", eta Eusko Jaurlaritza "ekintzen gobernua dela, hitzen gobernua baino" eta bide horri jarraituta jardungo duela.

Erronka demografikoa gai "serioa" eta "potoloa" dela eta "geratzeko etorri" dela uste du Ubarretxenak, eta Euskadiri ez ezik, Espainiari eta Europari ere eragiten diola. Horren esanetan, migrazioaren erronkari "erantzukizunez" eta "ondo" erantzuteko tresnak behar ditu Eusko Jaurlaritzak. "Gurean migrazio fenomenoa pixka bat beranduago etorri da, Euskadik badauka integrazio sistema bat eta sistema horri eutsi behar diogu", gaineratu du. Tresnak ez ezik, "erabakitzeko eskubide eta gaitasun handiagoa" ere aldarrikatu ditu pertsona migratzaileei "integraziorako aukerak" eman ahal izateko.

Arana zentroa

Bestalde, Espainiako Gobernuak Gasteizen eraiki nahi duen errefuxiatuentzako zentroaren harira, eredu talka dagoela zehaztu du Ubarretxenak: "Aranako zentroak talka egiten du gure ereduarekin".

Ubarretxenaren arabera, Euskadiko arreta eredua ezberdina da, hau da, "zentroak tamainaz txikiagoak dira eta atentzioa pertsonalizatuagoa da". Aitzitik, Gasteizko Arana klinika zaharrean planteatzen den zentroa "handiagoa" da.

Bestalde, PPk Arana zentroaren aurka sinadura bilketa egin behar zuela iragarri ostean, "erantzukizunez eta arduraz" jokatzeko deia egin du Ubarretxenak. "Momentua da dezibelioak jaisteko, lanean serio jarduteko eta erronka serio honetan denok elkar hartzeko", gehitu du.