Hauek dira Presidenteen Konferentziaren puntu aipagarrienak

Pedro Sanchezen gobernuaren eta PPren arteko tirabira politikoek eta akusazioek asko gaiztotu dute Bartzelonan egingo duten Presidenteen Konferentzia, eta horrek zalantzan jarri ditu akordioak adosteko aukera guztiak.

PPko presidente autonomikoak maximoen programa batekin joango dira Bartzelonara, eta, besteak beste, etxebizitza legea indargabetzeko, nuklearren bizitza luzatzeko eta Kataluniarekin finantzazio edo migrazio gaietan dauden akordio bereziak bertan behera uzteko eskatuko diote Gobernuari.

Ostegun honetan, Albert Dalmau Kataluniako Gobernuko Presidentetzako kontseilariak "dena lehertzera" ez joateko eskatu die popularrei, eta tonu eraikitzailearen alde egin du. PPko buruzagiek planto egiteko mehatxua egin zuten gai-zerrendak popularrek proposatutako gaiak jaso ezean, eta badirudi XVIII. goi-bilera autonomiko hau akordiorik gabe amaituko dela.

Bilera horren aurretik, Isabel Diaz Ayuso Madrilgo Erkidegoko presidenteak fronte berri bat ireki du, eta konferentzian gaztelaniaz hitz egiten ez badiote alde egingo duela aurreratu du. Aldi berean, katalana "probintziakeria egiteko" erabiltzen ari direla kritikatu du.

Hizkuntza koofizialak erabiltzeko aukera berria da Bartzelonako konferentzian, Kataluniako Gobernuak eta Eusko Jaurlaritzak eskatu ondoren, Angel Víctor Torres Lurralde Politikako ministroak aste honetan azaldu duenez.

Ayusoren esanetan, koherentziagatik doa Bartzelonara, askotan eskatu baitute konferentzia biltzeko, gainerako presidenteei entzuteko, "kataluniarrak ez gutxiesteko" eta Gobernuaren "mafia" eta "barrabaskeriak" salatzeko.

Immigrazioa, aurrez aurreko agertokia

Duela sei hilabete Santanderren egindako Presidenteen Konferentziaren aurrean egin zuten bezala, Kanaria Uharteek eta Euskadik indarrak batzea erabaki dute, Bartzelonan migrazio-dramari heltzeko. Imanol Pradales lehendakariak eta Fernando Clavijo Kanarietako Autonomia Erkidegoko presidenteak migrazio-politikarako plan integral eta estruktural baten beharra defendatuko dute, egiturazko fenomeno horri erantzun "koordinatu, humanitario eta iraunkorra" emateko.

Hala ere, akordio bat adosteko zailtasun handiak daude, PPk gobernatzen dituen lau erkidegok (Madril, Aragoi, Kantabria eta Extremadura) Kanarietan inoren kargura ez dauden adingabe migratzaileak erkidegoetan birkokatzeko errege-dekretuaren aurkako helegitea aurkeztu baitute.

PPko presidenteek nahi dute konferentzian aitortzea Estatuak eskumen esklusiboa duela mugako kontrolaren eta immigrazioaren arloan, eta, ondorioz, argi eta garbi arbuiatzea Gobernuak Juntsekin duen akordioa, migrazioa kudeatzeko eskumena Kataluniarekin partekatzeko.

Trantsizio energetikoa

Horrez gain, lehendakariak "sare elektrikoetan inbertitzeko salbuespenezko mekanismo bat" proposatuko du konferentzian, trantsizio energetikoa eta industria deskarbonizatzeko bidea bultzatzeko.

Itun zaila etxebizitza-arloan

Espainiako Gobernuak ez du amore eman, eta asteazken honetan Sanchezek gutun bat bidali die erkidegoetako presidenteei 2026-2030 Etxebizitzari buruzko Estatu Akordioa proposatzeko.

Hainbat neurri proposatu ditu, hala nola inbertsio publikoa hirukoiztea ia 7.000 milioi euroraino (Gobernuak horren % 60 jarriko luke, baldin eta exekutibo autonomikoek gutxienez 2.700 milioi jarriko balituzte), babes publikoko etxebizitzen kalifikazioa mugarik gabe blindatzea eta atari pribatu batzuek duten informazioaren monopolioarekin amaitzea sistema gardenago bihurtuta.

Proposamenaren xehetasunetan sartu gabe, baina, PPk kritikatu egin du etxebizitzari buruzko iragarkiak egitea "ustelkeriak gehien mugatzen duenean", eta esan du ez duela sinesgarritasunik itun nazionalen buru izateko.

TVEn egindako elkarrizketa batean, Isabel Rodriguez Etxebizitza ministroak adierazi duenez, zaila da Gobernuaren eskaintzari ezetz esatea, ez dago PPri zuzenduta eta oso gutxi espero du haien partetik. Horren harian, azpimarratu du gobernu autonomikoei begira egin dutela, horiek baitira gai horretan eskumena dutenak.