Eusko Jaurlaritzak "onartezintzat" jo du Ayusoren euskararekiko errespetu falta Presidenteen Biltzarrean

Eusko Jaurlaritzak "atsekabea" adierazi du Presidenteen Biltzarrean Imanol Pradales lehendakariak egin duen hitzaldian erkidegoetako presidente batzuek, Isabel Diaz Ayuso Madrilgo presidenteak besteak beste, izan duten jarrerarengatik.

Lehendakaritzako iturrien arabera, "onartezina" da "euskararekiko, lehendakariarekiko eta Euskal Herriarekiko" erakutsitako errespetu falta, Isabel Diaz Ayuso Madrilgo presidenteak Pradales euskaraz hitz egiten hasi orduko aretotik alde egin baitu.

Horrez gain, beste agintari autonomiko batzuek bat-bateko itzulpenak egiteko gailuak ez erabiltzea erabaki izana salatu du Jaurlaritzak, elkar ulertzea saihestu baitute.

Horren iritziz, jarrera horrek talka egiten du Presidenteen Biltzarraren espirituarekin, lehen aldiz hizkuntza koofizialak (katalana, galegoa eta euskara) gaztelaniarekin batera erabiltzeko aukera ematen baitu.

"Hizkuntza ofizialak errespetatzea ez da garrantzirik gabeko keinua; hizkuntza-berdintasuneko eskubideekin eta oinarrizko errespetu instituzional, kultural eta demokratikoarekin dago lotuta. Hizkuntza ofiziala eta Europa osoaren ondarea da euskara", gaineratu du.

Aitor Esteban EAJko presidentearen ustez, Isabel Diaz Ayusok "politika egiteko argudio sakonik ez duela erakutsi du".

"Euskara edo katalana erabiltzeagatik eskandalizatzen denak arazo larria du eta politika egiteko argudio sakonik ez duela erakusten du", idatzi du Estebanek bere sare sozialetan, eta lehendakaria zoriondu du euskaraz hitz egiteagatik.

Pello Otxandiano EH Bilduren Eusko Legebiltzarreko bozeramaileak ohartarazi duenez, "XXI. mendeko faxistek ere ez dute lortuko euskara desagerraraztea". "Ezin izan zuten herri bat, bere hizkuntza, bere kultura eta bere askatasun irrika desagerrarazi. XXI. mendeko faxistek ere ez dute lortuko", adierazi du. "Euskaldunak gara eta harro gaude", azpimarratu du.

Eneko Andueza PSE-EEko idazkari nagusiaren ustez, Ayusok "ez du Espainia den bezala ulertzen". "Euskara, galegoa eta katalana Espainiako kultura-ondarea dira. Hori ulertzen ez duenak ez du Espainia bere horretan ulertzen", esan du Anduezak bere sare sozialetan.

Laura Garrido EAEko PPren Legebiltzarreko bozeramailearen iritziz, Presidenteen Biltzarrean sen onak izan beharko luke nagusi, eta bi hizkuntza ofizial dituzten autonomietako presidenteek, lehendakariak bezala, gaztelaniaz hitz egin beharko lukete, gainerakoei "adeitasuna" erakusteko.

"Lehendakariak euskara eta gaztelania erabili ohi ditu, baina jende gehienak euskaraz egiten ez duela dakienean, gehienetan gaztelania erabiltzen du. Ez da afera puztu behar kontuan izanda foro horretan beti erabili izan dela gaztelania, mundu guztiak ulertzen duela", gaineratu du. Garridok ez ditu baloratu nahi izan Ayusok aretoa uzteko dituen "motibazioak", ezta PPko gainerako presidenteenak ere bertan geratzeko dituztenak.

Lander Martinez Bizkaiko Sumarreko diputatuaren aburuz ere, "onartezina" da "Estatuko hizkuntza aniztasunaren aurka eraso egitea". "Hizkuntza ofizialak errespetatzea ez da keinu txikia: eskubide kontua da, hizkuntza berdintasunarena eta errespetu demokratikoarena", gaineratu du.