Ayusok hankaz gora jarri du Biltzarra: alde egin du lehendakaria euskaraz ari zen bitartean

Madrilgo Erkidegoko presidente Isabel Diaz Ayusok Presidenteen Biltzarretik alde egin du Imanol Pradales lehendakaria euskaraz berbetan hasi denean. Ayusok hizkuntza ofizialen erabileraren aurka egin du horrela, aurretik ohartarazi bezala. Salvador Illa Kataluniako presidentea hizketan ari zen bitartean ere, aretotik atera da, eta hitzaldia amaitu ostean itzuli da.

Madrilgo Gobernuko iturriek adierazi dutenez, Ayusok Presidenteen Konferentziako bileratik ateratzea erabaki du, lehendakariak bere hitzaldia euskaraz hasi duenean. Madrilgo presidenteak gogor egin du hizkuntza koofizialen eta aldibereko itzulpen sistema erabiltzearen aurka. Bere hitzaldian, Espainia herrialde plurinazionala izatea errefusatu du, eta gaztelania aldarrikatu du Estatuko hizkuntza ofizial bakar gisa.

Eusko Jaurlaritzak "atsekabea" adierazi du Presidenteen Biltzarrean Imanol Pradales lehendakariak egin duen hitzaldian erkidegoetako presidente batzuek, Isabel Diaz Ayuso Madrilgo presidenteak besteak beste, izan duten jarrerarengatik. Lehendakaritzako iturrien arabera, "onartezina" da "euskararekiko, lehendakariarekiko eta Euskal Herriarekiko" erakutsitako errespetu falta.

Hala ere, hori ez da izan Madrilgo agintariak sortu duen tentsio une bakarra; izan ere, Monica Garcia Osasun ministroarekin ere izan du tirabira, eta protokoloko langile  batek esku hartu behar izan du liskarra saihesteko. Osasun Ministerioko iturrien arabera, Monica Garcia ministroa Ayuso agurtzen saiatu da, modu instituzionalean, baina Ayusok hotz erantzun dio, "hiltzaile bati musu bat" eman nahi ote zion galdetuta. Duela gutxi Mas Madridek egindako adierazpenei buruz ari zen Ayuso, egoitzetan "heriotzaren inguruko protokoloak" bultzatzea leporatu baitio Mas Madridek PPri. Azkenean, protokoloko langile batek aldendu ditu.

Pedro Sanchez Espainiako presidentearekin eta Salvador Illa anfitrioiarekin ere jarrera hotza izan du Ayusok.

Felipe VI.a erregearekin gosaldu ostean, hitzaldiak hasi baino lehen, Sanchezek adierazpen bat egin du Kataluniako presidentearekin batera, eta Espainiaren egoera ekonomiko ona nabarmendu du, nahiz eta ziurgabetasuna den nagusi munduan.

Biltzarra Katalunian egitea ere nabarmendu du, bertako instituzioei eta herritarrei begirunea erakutsi eta Kataluniaren eta Espainiaren arteko arazoei erantzuteko "laguntza eman izana" eskertzeko.

Horren harira, Kataluniak, Euskadirekin batera, bilera horretan hizkuntza koofizialak lehen aldiz erabili ahal izateko egindako eskaera onartu behar zela adierazi du.

"Baietz besterik ezin genuen esan. Integratzen duen, baztertzen ez duen eta Espainia bezalako herrialde handi baten lurralde aniztasuna aktibo gisa aitortzen duen herri proiektu baten isla da", esan du.

Espainiako presidenteak autonomia erkidegoei etxebizitza arloan egindako proposamena ere azaldu du bere hitzaldian: etxebizitza publikoetan inbertsioa hirukoiztea 7.000 milioi euroraino. Espainiako Gobernuak diru horren % 60 finantzatzea aurreikusten du planak, eta autonomiek gainerako % 40a hartuko lukete beren gain. "Helburua da etxebizitza babestuen parkea estrukturalki indartzea eta sarbidea erraztea, bereziki belaunaldi gazteenei", horren esanetan.

Sanchezek berretsi du inbertsio horrekin batera bermeak ere jarri behar direla, "etxebizitza publikoek inbertsio funts pribatuen eskuetan buka ez dezaten".

Erkidegoen finantzaketari dagokionez, Sanchezek iragarri du Zerga eta Finantza Politikako Kontseiluaren bilera bat deituko duela, erkidegoen zor publikoaren zati bat barkatzeko eta finantzaketa-eredu berri baterantz aurrera egiteko. Hala ere, zenbait autonomia, Madrilgo Erkidegoa kasu, neurri horien aurka agertu dira.

Immigrazioari dagokionez, bakarrik dauden adingabe migratzaileak autonomia-erkidegoen artean banatzeko akordio bat eskatu du Sanchezek, eta erronka horri irtenbide bateratu bat bilatzeko beharra azpimarratu.

Elkarrizketa eta lankidetza sustatzeko ahaleginak egin badira ere, Biltzarrak agerian utzi ditu Espainiako Gobernuaren eta hainbat gobernu autonomikoren artean dauden desadostasun sakonak, eta horrek zaildu egin du aztertutako gaietan adostasunak lortzea.