Feijook demokraziaren aurrean "errenditzeko" eskatu dio Sanchezi, eta hura ordezkatzeko prest agertu da

Alberto Nuñez Feijoo PPko buruzagiak demokraziaren aurrean "errenditzeko" eta hauteskundeak deitzeko eskatu dio Pedro Sanchez Espainiako Gobernuko presidenteari. Madrilgo Espainia plazan egin ditu adierazpen horiek Feijook, Alderdi Popularrak igande eguerdirako deitutako kontzentrazioan milaka lagun (100.000, antolatzaileen arabera; erdia baino gutxiago, Gobernu Ordezkaritzaren arabera) aurrean zituela. 

"Errenditu zaitez demokraziaren aurrean. Dei itzazu hauteskundeak. Inork ez zizun hau egiteko botorik eman", esan dio Feijook Sanchezi hitzaldi kartsu batean, eta "duintasunaren eta askatasunaren iraultzaren buru" izateko prest agertu da.

Feijook Sanchez ordezkatzeko gertu dagoela adierazi du: "Espainia prest dago eta ni prest nago. Orain falta den bakarra da Sanchezek hautetsontziak jartzeko eta espainiarrei galdetzeko adorea aurkitzea".

Milaka lagun bildu dira igande honetan Madrilgo Espainia plazan, PPk Pedro Sanchezen gobernuaren "degradazioa" salatzeko "Mafia ala demokrazia" lelopean deitu duen elkarretaratzean. 

Parte-hartzaileek Espainiako banderak eta aterkiak eraman dituzte, eta ez PPkoak (bakarren batzuk baino ez dira ikusi), Alberto Nuñez Feijook eskatuta. Izan ere, Espainiako popularren buruak PPren sinbologia duten objekturik ez eramateko eskatu du bilkura bezperatan, beste alderdi batzuetako bozkatzaileak bereganatzeko. 

Alderdi Popularreko erkidegoetako eta eskualdeetako presidenteek babestu dute Feijoo, baita Mariano Rajoy eta Jose Maria Aznar Espainiako Gobernuko presidente ohiek ere; Francisco Camps Valentziako Generalitateko presidente ohia ere zen tartean. 

Ekitaldia hasi aurretik Feijook kazetariei esan dienez, gaurko bilkura "guztiz modu positiboan demokraziaren alde" egin zedin nahi zuen.  

Besteak beste, "Democracia sí, mafia no" ("Demokrazia bai, mafia ez"), "Ni mafia ni sanchocracia, queremos democracia" ("Ez mafia ez sanchokrazia, demokrazia nahi dugu"), "Unidos por una España mejor" ("Espainia hobe baten alde elkarturik") eta "Que te vote Gepetto" ("Bozka zaitzala Gepettok") leloak zituzten pankartak eraman dituzte parte-hartzaileek. Gaurkoan ere, DJ Pulpo izan da musikaz girotzeko arduraduna, eta Sanchezen gobernuaren "gezurrak" kritikatu ditu kantu eta kantu artean. 

Azken egunotan, PPko buruak Madrilgo Espainia plaza betetzeko deia egin die "hainbeste ustelkeria, doilorkeria eta gezurrekin nazkatuta" dauden espainiarrei. "Sanchez soberan dago, lotsa hau gainetik kendu behar du Espainiak", esan zuen larunbatean Santanderren. Bertan hitz eman zuen erakundeen "erabateko garbiketa" egingo duela Moncloara iristen bada.