Alzorrizek dimisioa eman du PSNko idazkariorde nagusi gisa, bere bikotekideak Servinabarren lan egin zuela onartu ondoren

Ramon Alzorrizek dimisioa aurkeztu du gaur Nafarroako Alderdi Sozialistako idazkariorde nagusi gisa, Guardia Zibilaren UCOk egindako ikerketen ondotik, eta Santos Cerdan PSOEko Antolakuntza idazkari nafarrak dimisioa eman ondoren.

Alzorrizek prentsaurreko batean jakinarazi duenez, bere bikotekideak Belateko tuneletako eraikuntzan parte hartu zuen Servinabar enpresan lan egin du. Gaur jakitera eman dutenez, UCOk adierazi du Cerdan enpresa horren % 45en jabe zela.

Alzorrizek ere dimisioa eman du Nafarroako Parlamentuko PSNren bozeramaile gisa, baina parlamentari bezala jarraituko du. Cerdan enpresa horren zati baten jabea zela jakin ostean, Maria Chivite Nafarroako Gobernuko presidente eta PSNko idazkari nagusiari jakinarazi dio bere bikotekidea 2021etik 2024ra egon dela lanean Servinabarren, "presidenteak ez zekien informazio hori, eta jakin beharko lukeela uste izan dut".

Ramon Alzorrizek adierazi du berak ez zekiela Cerdan Servinabarren parte hartzen ari zenik, eta azaldu du bere neska-lagunak "lan prekarioa" zuela eta "baldintza hobeetan" hasi zela lanean bertan.

Azaldu duenez, informazio horren berri izan ostean, Chivitek esan dio konfiantza galdu duela eta horregatik erabaki duela dimisioa ematea.

Chivitek ezagutzen ez zuen informazioa da, eta "zintzotasun ariketa batean" eman du jakitera, Alzorrizen hitzetan, horrek ez baitu deliturik inplikatzen. "Gobernuaren enpresa esleipendun batean norbaitek lan egitea ez da ezeren zantzua", azpimarratu du.

Alzorrizek aitortu du bera jarri zela harremanetan Servinabarreko jabearekin, bere bikotekidea kontrata zezala eskatzeko.

Orain arte PSNko bigarrena izan denak, dimisioa emateko gutuna idatzi eta aurkezteko asmoa du ostegun goizean, eta Chivitek "arrazoi osoz" eskatu dio prentsaurrekoa emateko eta gertatutakoa publikoki azaltzeko.

Chiviterekin izandako bilera "gogorra" izan dela onartu ostean, "presidente izateaz gain, nire laguna delako", esan du Alzorrizek: "Gure erabakian gailendu dena Nafarroako Gobernuaren eta Alderdi Sozialistaren defentsa izan da beti".

Chiviteren dimisioa eskatu du UPNk

Cristina Ibarrola UPNko presidenteak nabarmendu duenez, "gaur goizean Chiviteren dimisioa eskatzeko arrazoirik bazegoen, orain ez dago beste aitzakiarik, dimisioa eman behar du".

"Arratsaldean ezagututakoak nabarmenago egiten du ezin duela minutu bat gehiago ere jarraitu Nafarroako Gobernuaren buruzagitzan", adierazi du ohar batean, eta azpimarratu du ez dutela uste "Maria Chivitek ere ez zekiela ezer honetaz".

"Baldin bazekien eta ezkutatu egin badu, gaizki, baina bere laguntzaile estuenek zer egiten duten ez bazekien, nafar guztien presidente izateko gaitasunik ez duela ere erakusten du", gaineratu du.