Zergatik uste du epaileak Cerdanek “egozten zaizkion gertakarietan” parte hartu zuela? Atzemandako zantzuak, hemen

Leopoldo Puente Auzitegi Goreneko epaileak espetxera bidali du Santos Cerdan PSOEko buruzagi ohia, astelehen honetan deklaratu ostean. Epailearen esanetan, espetxeratzea dekretatu duen autoak dakarrenaren arabera, "etorkizunean garrantzitsuak izan daitezkeen froga-iturriak ezkutatzeko, suntsitzeko edo aldatzeko arriskua" ikusten duelako hartu du erabakia.

Horrez gainera, hainbat “zantzu” aipatzen ditu "egozten zaizkion gertakari larrietan parte hartu” duela pentsarazten dutenak. Horien artean, Koldo Garcia aholkulari ohiaren gailuetan atzemandako “elkarrizketa esplizituak” aipatzen ditu.

Epailearen arabera, "zantzuak nahikoak dira gertakarietan parte hartu izana justifikatzeko". Gainera, azpimarratzen du buruzagi sozialista ohiak ez dituela eduki horiek zalantzan jarri astelehen honetan egindako adierazpenean; izan eren, adierazi zuen ez dituela "gogoratzen”.

Epaileak uste du grabazio horiek Santos Cerdanek trama honetan zeukan “lekua” ere erakusten dutela. Bere ustez, "enpresekin harremanetan jartzen zen", eta ordainketak erreklamatzeko ardura bere gain hartzen zuen.

Bestalde, Cerdanek Servinabar enpresaren partaidetza sozialak lortzeko egindako salerosketa-kontratu pribatua ere aipatu du magistratuak, baita enpresa hori "administratzeko nolabaiteko gaitasuna zuela agerian utziko luketen” mezu elektroniko batzuk ere.

Servinabarrek Accionarekin aldi baterako enpresa elkarte bat (ABEE) eratu zuen, eta magistratuak bereziki aipatzen ditu Accionari esleitutako obrak, 537,2 milioi euro inguruko balioa baitzuten.

Epailearen autoak dio "zantzuen arabera, Abalos eta Garciarentzat adostutako eskupekoa milioi bat euro ingurukoa” dela, eta “oso portzentaje txikia” iruditzen zaio “operazio horien neurria” kontuan hartuta.

Beraz, honako hipotesi hau plazaratu du: "obrak behar legez kanpo esleitzeagatik emandako sari ekonomikoaren zenbatekoa esleipenen balioaren % 1 izan balitz, sari hori bost milioi eurotik gorako zenbatekoa izango litzateke, zantzuen arabera Abalos eta Garciari zegokion zatia baino askoz ere handiagoa". Ondorioz, epaileak esan du "beti ere zantzuen arabera, horrek indartu" egiten duela pertsona fisiko edo juridiko "gehiagok aipatutako esleipenekin irabaziak izan zitzaketen ideia".

Abalos Garraio ministroa zenean, hark eta Garciak Santos Cerdanekin trukatutako mezuak ere aipatu ditu epaileak, "izendapen jakin batzuk" hobestearen alde egin eta beste batzuk bazterrarazteko, "pertsona horiek ondoren esleipenetan parte-hartze aktiboa izan zezaketelarik".