'Begoña Gomez auzia'-n Gorenak Bolaños ikertzearen aurka agertu da Fiskaltza

Fernando Prieto Auzitegi Goreneko fiskala Juan Carlos Peinado epaileak Felix Bolaños Presidentetza, Justizia eta Gorteekiko Harremanetarako ministroa ikertzeko egindako eskaera onartzearen aurka agertu da. 

Peinadok Bolaños ikertzea eskatu du "Begoña Gomez auzian" lekukotza faltsua eta dirua bidegabe erabili izanaren zantzuak ikusi baititu.

Prietok Onarpen Aretora eraman du txostena eta hark erabaki beharko du Ministerio Publikoak markatutako ildoari jarraitzen dion ala Peinadoren eskaerari bide ematen dion. 

Peinadok azalpen arrazoitu bat igorri zuen Auzitegi Gorenera, Bolaños ikertzeko eskatuz, Cristina Alvarez Gomezen aholkulari gisa kontratatzeagatik aipatu delitu horiek egin zituela iritzita.

Agentziek azaldu dutenez, fiskalak dio Peinadok ez duela datu objektiboekin justifikatu Alvarezek funtzio publikotik kanpoko jarduera pribatuak egin izana, eta ez duela azaldu, hala balitz, zergatik izango litzatekeen Bolaños horren erantzule.

Ildo horretan, Fiskaltzak aurpegiratu dio ez duela gutxieneko froga-printzipiorik aurkeztu Avarezek bere lanpostuari zegozkion funtzioez harago jardun izana frogatzeko. 

Era berean, adierazi du ez duela objektiboki argudiatu Bolañosek Gomezen ustezko jarduera pribatuak (zeintzuetan Alvarezek parte hartu izango baitzuen) ezagutzen zituela, jarduera horie ustez ezagutza publikokoak eta agerikoak zirela esateaz aparte. 

Fiskaltzaren ustez, instruktoreak ez du oinarritu zergatik zuen Alvarezek Bolañosekiko balizko mendekotasun organiko eta funtzionala, are gehiago, kontuan hartuta, Peinadok ustezko mendekotasun horretan oinarritzen duela Bolaños ikertzeko eskaera. 

Azkenik, fiskalak dio Peinadok ez duela argudiatu Bolañosek zein modutan kontrolatu ote dituen ustez bidegabe erabili diren ondasun publikoak, zehazki, aurrekontuen kudeaketan.

Bolañosen aurkako "arrazoizko zantzu sendoak eta kualifikatuak" daudela argudiatuta Goreneko Zigor Arloko Salara jo zuen Peinadok, hori baita Gobernuko kide baten aurkako ikerketa abiarazteko eskumena duen Sala bakarra.

Testigantza faltsuaren delitua argudiatzeko Bolañosen eta Raul Diaz Moncloako langileen arduradunaren lekukotzetan aurkitutako kontraesanak azpimarratu ditu. 

Dirua bidegabe erabiltzeari dagokionez, arrazoitu du Bolañosek zuela Alvarezi ordaintzeko erabili ziren funts publikoak zaintzearen ardura, eta gaineratu du Begoña Gomezi Gobernuko presidentearen emazte gisa ez ezik, jarduera pribatuetan ere laguntzen ziola Alvarezek.