Sanchezek hil ala biziko Batzorde Federalari ekingo dio, PSOEren norabidea zuzentzeko asmoz

Pedro Sanchez Espainiako Gobernuko presidente eta PSOEren idazkari nagusiak mugarri izango den PSOEren Batzorde Federalari ekingo dio gaur, eta alderdiaren buruzagitza berregituratzeaz gain, ustelkeriaren aurkako barneko neurriak onartuko dira, Santos Cerdan Antolakuntza idazkari ohiak sortutako krisiaren ostean.

Cerdan preso dago ‘Koldo auzia’n ustez izan zuen parte hartzeagatik, eta krisi horren erdian antolatu dute Batzorde Federala, Rebeca Torro valentziarra, orain arte Industriako Estatu idazkari izan dena, Antolakuntza idazkari izendatzeko, besteak beste.

Sanchezek erabakita, aurrerantzean Antolakuntza idazkariak hiru “laguntzaile” izango ditu. Anabel Mateos (sozialisten Exekutiba Federaleko Kostako Udalerrietako idazkari zena, Lurralde Koordinazio idazkari izango da) eta Borja Cabezon (Ekintza Demokratikoko eta Gardentasuneko arduradun izango da aurrerantzean ere) hiru horietako bi izango dira; ikusteko dago hirugarrena zein izango den, Francisco Salazar izan behar baitzen, baina Batzorde Federala hasi baino ordu batzuk lehenago uko egin dio postuari, sexu-jazarpen salaketa batzuen ostean.

Halaber, emakumezkoak izango dira alderdiaren hirugarren agintari nagusia, bozeramailea, Montse Minguez, eta horren ondokoa, Enma Lopez.

Batzorde Federalean onartuko dira izendapenak, eta PSOEko Zuzendaritzako bost kidek, gutxienez, postua utzi beharko dute bateraezintasunengatik, % 10ek soilik urratu ditzaketelako bateraezintasun horiek. Horietako bat Maria Jesus Montero Espainiako Gobernuko presidenteorde eta PSOEren idazkari nagusiordea izango da.

Izen dantza handiagoa izan daiteke, baina aldi berean, kode etikoa gogortuko dute, eta barne kontrolak ere bai, askorentzat urriegiak izan direlako, Cerdanen kasua ikusita.

Pasa den ostiralean, PSOEko berdintasun arloko emakumeekin egindako batzar batean, Sanchezek iragarri zuen kode etikoa aldatu egingo duela prostituziora jotzen duten pertsonak alderditik kanporatu ahal izateko.

Guardia Zibilak ‘Koldo auzia’n egindako ikerketen arabera, Jose Luis Abalosek eta bere aholkulariak, Koldo Garciak, prostituzioaz jarduten zuten maiz.

Alderdiko 315 kargudunek iragarri dute jada Ferrazeko bileran egongo direla. Sanchez izango da hitza hartzen lehena, eta ondoren hitz egingo dute hitza eskatzen duten gainerakoek.

Kritikoenen artean egongo da Emiliano Garcia-Page Gaztela Mantxako presidentea, Sanchezen azalpenak entzutera eta ardurak bere gain hartzea zertan datzan jakiteko asmoz bertaratuko omen dena.