Espainiako Gobernuak hondamendi eremu izendatu ditu 16 erkidego, ekainaz geroztik izandako sute eta uholdeengatik

Espainiako Gobernuko Ministroen Kontseiluak,  astearte honetan, onartu egin du larrialdi klimatikoek eragindako lurraldeak hondamendi eremu izendatzea. Hain zuzen ere, ekainaren 23tik aurrera larrialdi klimatikoren bat —hala nola baso-suteak, eurite handiak eta GOIDIaren ondoriozko uholdeak— jasandako lurralde guztietan aplikatuko da.

Fernando Grande-Marlaska Barne ministroak adierazi duenez, erabakiak kalte-ordainak eta dirulaguntzak eskatzen hastea ahalbidetuko du, nahiz eta azken emergentzia-aldia amaitu gabe dagoen eta suteek utzitako kalteak oraindik neurtu gabe egon. "Helburua da kaltetuen bizimodua normalizatzeko prozesua lehenbailehen hastea. Kaltetuek Gobernua izango dute ondoan, eta behar beste laguntza emango diegu", azpimarratu du ministroak.

Horrekin batera, Grande-Marlaskak adierazi du larrialdi horiek (113 sute eta 5 uholde) "azken urteetako hondamendirik handiena" direla. Kalte ordainak jasotzeko legezko bidea zabaldu duela Gobernuak zehaztu du; hau da, deklarazioak ez du laguntza zehatzik jasotzen, baina bai "eskumena duten sail guztiak dagozkien aginduak eta ebazpenak ematen hasteko aukera".

Neurriak 17 autonomia-erkidegoetatik 16 hartzen ditu, ekainaren 23tik abuztuaren 25era muturreko fenomeno klimatikoek kolpatutako eremu guztiak. Euskal Autonomia Erkidegoa soilik gelditu da kanpoan, denbora tarte horretan suterik eta uholderik izan ez duelako. 

Zer ondorio ditu adierazpen honek?

Babes Zibileko larrialdi batek larriki erasandako eremuaren izendapena, herritarrek hondamendi-eremu izendapenez ezagutzen dutena, Babes Zibileko Legearen 23. artikuluan jasota dago. Administrazio publiko interesdunek eskatu dezakete, Estatuko Gobernuak txosten bat eskatu ahal izango die kaltetutako autonomia-erkidegoei, eta Ministroen Kontseiluak du adierazpena egiteko eskumena.

Laguntzak hainbat motakoak izan daitezke, eta partikularrei edo erakundeei zuzenduak:

- Partikularrentzako laguntza ekonomikoak, ohiko etxebizitzan eta premiazko ondasunetan izandako kalteengatik.

- Tokiko erakundeentzako dirulaguntzak, beren jardunak eragindako gastuengatik.

- Prestazio pertsonala edo ondasunak eman dituzten pertsona fisiko edo juridikoentzako laguntzak, edo industria-, merkataritza- eta zerbitzu-establezimenduetarako laguntzak.

- Udal-azpiegituretan izandako kalteengatiko dirulaguntzak.

- Nekazaritza-, abeltzaintza-, baso- edo akuikultura-ekoizpenetan kalteak izateagatiko laguntzak.

- Kreditu Ofizialeko Institutuak (KOI) emandako mailegu-lerroak.

Agintariek neurri fiskalak, lan-arlokoak edota Gizarte Seguratzarekin lotutakoak ere har ditzakete.