Xabier Iraola aukeratu dute Sorturen koordinatzaile orokor, Arkaitz Rodriguezen lekukoa jasota

Gaurdanik Xabier Iraola (Igeldo, 1993) da Sorturen koordinatzaile orokor berria, Arkaitz Rodriguezi erreleboa hartuta. Sortuk Ficoban (Irun) egin duen IV. Kongresua ixteko ekitaldian hartu du kargua Iraolak, militanteen % 96ren babesa eskuratuta. Garai berrian hiru erronka ezarri ditu Iraolak: "euskal proiektu nazionala eraberritzea, politikaren zentzu eraldatzailearekin birkonektatzea eta euskal estatuaren oinarriak eraikitzea".

Koordinatzaile orokor kargua ez ezik, Nazio Idazkaritza ere berritu du Sortuk. Zortzi emakumek eta zazpi gizonek osatuko dute zuzendaritza berria, eta ‘Herri gogoa’ ponentzian jasotakoak izango dituzte gidalerro nagusi. Iraola Ernairen sortzaileetako bat izan zen, eta Sorturen Herrigintzako idazkaria izan da azken bost urteetan

Militanteei eta aurreko Nazio Idazkaritzari eskerrak emanez hasi du bere hitzaldia Iraolak, eta "besarkada beroa" eskaini die "euskal preso, iheslari eta deportatu politikoen senitartekoei". Ondoren, egungo nazioarteko politikaren argazkia atera nahi izan du, eta "kapitala ala bizitza" atakaren aurrean, Sortuk "bizitza" aukeratzen duela azpimarratu du. Horren harira, Josu Jon Imaz Repsoleko kontseilari ordezkariak Trumpi egindako esker hitzak salatu ditu: "Josu Jonek, kapitala; guk, bizitza", esan du. 

Horren hitzetan, "krisi garaiak" dira egungoak, "arrisku handiko garaiak", baina baita "aukera handikoak" ere. "Gaur eta orain, jendarte sozialista baten ortzi muga eskaini beharra dago, egungo sistema politiko-ekonomikoa errotik aldatzeko gai izango dena, eta bizitza eta zaintza erdigunean jarriko dituena", adierazi du. Horren arabera, "klase borroka, borroka feminista eta antiarrazista, azken batean, zibilizazio justuago bat eraikitzea gure herrian nazio askapen prozesuarekin lotua dago". 

Sorturen erronkak hizpide, Xabier Iraolak hiru aipatu ditu: "euskal proiektu nazionala eraberritzea; politikaren zentzu eraldatzailearekin birkonektatzea (eskuin-muturraren eskutik politikaren aurkako jarrerak hedatzen ari diren garaiotan); eta euskal estatuaren oinarriak eraikitzea, eremuz eremu estatu gisa pentsatuz eta arituz". Horren ildotik, EH Bildu eta EH Bai koalizioen aldeko "apustua" sendotzea aldarrikatu du. 

Azkenik, "euskal nazio askapenerako mugimendua" ahotan, Iraolak belaunaldi berriei egin die deia: "Gu ez gaude gaur hemen beste askok ibili zituzten bide berak ibiltzeko. Gu gaur hemen gaude, honaino ekarri gaituen ibilkera presente, gure bide propioak ibiltzeko. Ezker abertzalearen proiektu politiko historikoaren sustraiak mantenduta, proiektu hori gaurkotzeko, eraberritzeko eta bide berriak irekitzeko". 

Rodriguez, "pozik" zortzi urteotan emandako "aurrera urratsekin"

Oso hunkituta azaldu da Arkaitz Rodriguez, agurrean. Ficoban bildutakoen txalo zaparrada beroa eta luzea jaso du donostiarrak. Sorturen koordinatzaile orokor izan den zortzi urteotan jasotako "babesa eta konpromisoa" eskertu ditu lehenik, eta, ondoren, balantzea egiteko orduan, lortutako aurrerapausoekin "pozik" azaldu da.